IPL 2026ની ફાઇનલમાં હારનો સામનો કરનારી Gujarat Titans માટે રવિવારની રાત વધુ મુશ્કેલ બની ગઈ હતી. અમદાવાદના નરેન્દ્ર મોદી સ્ટેડિયમમાં Royal Challengers Bengaluru સામે પાંચ વિકેટે પરાજય ભોગવ્યા બાદ ટીમની બસમાં અચાનક શોર્ટ સર્કિટ થવાથી ખેલાડીઓ અને સપોર્ટ સ્ટાફમાં ભયનો માહોલ સર્જાયો હતો.
મળતી માહિતી મુજબ, મેચ પૂર્ણ થયા બાદ ગુજરાત ટાઇટન્સની ટીમ બસ સ્ટેડિયમથી હોટેલ તરફ જઈ રહી હતી. તે દરમિયાન બસના ઇલેક્ટ્રિકલ સિસ્ટમમાં ખામી સર્જાતા ધુમાડો નીકળવા લાગ્યો. પરિસ્થિતિને ગંભીર માનતા ટીમ મેનેજમેન્ટ અને સુરક્ષા સ્ટાફે તરત જ તમામ ખેલાડીઓ તથા સપોર્ટ સ્ટાફને બસમાંથી સુરક્ષિત રીતે બહાર કાઢી લીધા હતા. સદનસીબે આ ઘટનામાં કોઈપણ ખેલાડી કે સ્ટાફ સભ્યને ઈજા પહોંચી નહોતી.
ઘટનાના કારણે ગુજરાત ટાઇટન્સના ખેલાડીઓને થોડો સમય રસ્તા પર જ રાહ જોવી પડી હતી. અહેવાલો અનુસાર, લગભગ એક કલાક સુધી ટીમને વૈકલ્પિક વ્યવસ્થાની રાહ જોવી પડી, ત્યારબાદ બીજી બસની વ્યવસ્થા કરીને તમામ સભ્યોને સુરક્ષિત રીતે હોટેલ પહોંચાડવામાં આવ્યા હતા.
એક તરફ ફાઇનલમાં હારનો નિરાશાજનક અંત અને બીજી તરફ બસમાં સર્જાયેલી આ તકનિકી ખામીના કારણે ગુજરાત ટાઇટન્સ માટે આ રાત યાદગાર કરતાં વધુ ચિંતાજનક બની ગઈ. જોકે સૌથી મોટી રાહતની વાત એ રહી કે સમયસર કાર્યવાહી થવાને કારણે એક મોટો અકસ્માત ટળી ગયો અને ટીમના તમામ સભ્યો સંપૂર્ણપણે સુરક્ષિત રહ્યા.
Gujarat Titansના ખેલાડી સાથે મોટી દુર્ઘટના, રાત્રે કલાક સુધી રસ્તા પર ઉભા રહ્યા | Jamawat #GujaratTitans #Bus #Tragedy #Jamawat #Jamawatupdate pic.twitter.com/fnt83Ki1is
— Jamawat (@Jamawat3) June 1, 2026