ભારતીય ક્રિકેટનો ઉભરતો યુવા સ્ટાર વૈભવ સૂર્યવંશી પોતાની વિસ્ફોટક બેટિંગ ઉપરાંત અદભૂત આત્મવિશ્વાસ માટે પણ સતત ચર્ચામાં છે. હવે રાજસ્થાન રોયલ્સના મુખ્ય કોચ અને શ્રીલંકાના દિગ્ગજ ક્રિકેટર કુમાર સંગાકારાએ વૈભવ સાથે જોડાયેલો એક રસપ્રદ કિસ્સો શેર કર્યો છે, જે તેના નિડર સ્વભાવની સાબિતી આપે છે.
સંગાકારાના જણાવ્યા અનુસાર, IPL 2026 દરમિયાન લખનૌ સુપર જાયન્ટ્સ સામેની મેચ પહેલાં વૈભવ તેની પાસે આવ્યો અને પૂરા આત્મવિશ્વાસ સાથે કહ્યું કે તે આ ઇનિંગ્સમાં 13 છગ્ગા ફટકારશે. 15 વર્ષની ઉંમરના ખેલાડીનું આ નિવેદન સાંભળીને સંગાકારા પણ થોડા સમય માટે આશ્ચર્યમાં પડી ગયા હતા. જોકે તેણે વૈભવને માત્ર પોતાની રમત પર ધ્યાન કેન્દ્રિત કરવાની સલાહ આપી હતી.
મેચ શરૂ થયા બાદ વૈભવે પોતાના શબ્દોને લગભગ સાચા સાબિત કર્યા. તેણે આક્રમક બેટિંગ કરતાં 48 બોલમાં 93 રનની ધમાકેદાર ઇનિંગ્સ રમી અને તેમાં 10 શાનદાર છગ્ગા ફટકાર્યા. ભલે તે 13 છગ્ગા સુધી પહોંચી શક્યો નહીં, પરંતુ તેની નિર્ભય બેટિંગે સૌને પ્રભાવિત કર્યા હતા.
સંગાકારાએ કહ્યું કે વૈભવનો સૌથી મોટો ગુણ તેનો આત્મવિશ્વાસ છે. તે મોટા પ્રસંગોથી ડરતો નથી અને દરેક પડકારને તક તરીકે જુએ છે. આ જ કારણ છે કે નાની ઉંમરે પણ તે અનુભવી બોલરો સામે નિર્ભયતાથી રન બનાવી રહ્યો છે.
IPL 2026માં વૈભવ સૂર્યવંશીએ પોતાના શાનદાર પ્રદર્શનથી ક્રિકેટ જગતનું ધ્યાન ખેંચ્યું છે. તેની આક્રમક બેટિંગ, મેચ જીતાડવાની ક્ષમતા અને આત્મવિશ્વાસને કારણે ઘણા પૂર્વ ક્રિકેટરો તેને ભારતીય ટીમનું ભવિષ્ય માની રહ્યા છે. સંગાકારાનું માનવું છે કે જો વૈભવ આ જ રીતે મહેનત અને શિસ્ત જાળવી રાખશે તો તે આગામી વર્ષોમાં ભારતીય ક્રિકેટનો મોટો સ્ટાર બની શકે છે.