મુંબઈ ઈન્ડિયન્સનો મોટો નિર્ણય, કોચિંગ સ્ટાફમાં આ દિગ્ગજોનો સમાવેશ

ઈન્ડિયન પ્રીમિયર લીગ (આઈપીએલ) 2023 શરૂ થવામાં હજુ થોડો સમય બાકી છે, પરંતુ હરાજી બાદથી ટીમોમાં હલચલ મચી ગઈ છે. દરમિયાન, પાંચ વખતની આઈપીએલ ચેમ્પિયન મુંબઈ ઈન્ડિયન્સે જે અરુણ કુમારની નિમણૂક કરી છે, જેમણે ઘરેલુ ક્રિકેટમાં 16 વર્ષ સુધી શાનદાર પ્રદર્શન કર્યું છે, તેમને સહાયક બેટિંગ કોચ તરીકે નિયુક્ત કર્યા છે.

જમણા હાથના ઓપનિંગ બેટ્સમેન અરુણ કુમારે 100 થી વધુ ફર્સ્ટ ક્લાસ મેચ રમી છે. તેણે 1993 અને 2008 વચ્ચે કર્ણાટક માટે ઘરેલુ ક્રિકેટ રમ્યું હતું.

ક્રિકેટમાંથી નિવૃત્તિ લીધા પછી, તેઓ કર્ણાટકના બેટિંગ કોચ બન્યા જ્યારે તેમની ટીમે રણજી ટ્રોફી, ઈરાની કપ અને વિજય હજારે ટ્રોફી જીતી. તેઓ પુડુચેરી ટીમના મુખ્ય કોચ પણ હતા અને 2020 થી યુએસ રાષ્ટ્રીય ક્રિકેટ ટીમના મુખ્ય કોચ છે.

મુંબઈ ઈન્ડિયન્સના સપોર્ટ સ્ટાફની વાત કરીએ તો અહીં ઘણા મોટા નામો હાજર છે. સચિન તેંડુલકર ટીમનો આઇકોન છે, જ્યારે મહેલા જયવર્દને મુંબઇ ઇન્ડિયન્સ ફ્રેન્ચાઇઝીના વૈશ્વિક વડા છે. ઝહીર ખાનને ગ્લોબલ ક્રિકેટ ડેવલપમેન્ટ હેડ બનાવવામાં આવ્યો છે, જ્યારે માર્ક બાઉચર હવે મુંબઈ ઈન્ડિયન્સના કોચ હશે. શેન બોન્ડ બોલિંગ કોચ તરીકે, કિરોન પોલાર્ડ બેટિંગ કોચ તરીકે, જેમ્સ પેમેન્ટ ફિલ્ડિંગ કોચ તરીકે ટીમ સાથે સંકળાયેલા છે.