ટીમ ઈન્ડિયાના કેપ્ટન વિરાટ કોહલીએ એક સપ્તાહની અંદર બે મોટી જાહેરાતો કરીને ક્રિકેટ જગતમાં ગભરાટ પેદા કર્યો છે. કિંગ કોહલીએ પ્રથમ જાહેરાત કરી હતી કે તે આઈસીસી ટી-20 વર્લ્ડકપ બાદ ટી-20 આંતરરાષ્ટ્રીય ફોર્મેટના કેપ્ટનપદેથી રાજીનામું આપશે અને હવે રવિવારે કોહલીએ કહ્યું કે આરસીબીના કેપ્ટન તરીકે આ તેની છેલ્લી આઈપીએલ સીઝન હશે.
વિરાટ કોહલીએ 2013માં RCBની કેપ્ટનશીપ સંભાળી હતી. તેના નેતૃત્વમાં આરસીબી આજ સુધી આઈપીએલનો ખિતાબ જીતી શકી નથી. વિરાટે IPLમાં અત્યાર સુધી 132 મેચમાં ટીમની કેપ્ટનશીપ કરી છે. RCB એ આમાંથી 60માં જીત મેળવી છે, જ્યારે 65 મેચમાં હારનો સામનો કરવો પડ્યો છે. વિરાટ કોહલીએ કહ્યું કે તે પોતાના વર્કલોડ ઘટાડવા માટે કેપ્ટનશીપ છોડી રહ્યો છે અને આરસીબીમાં ખેલાડી તરીકે રમવાનું ચાલુ રાખશે.
આના પર, ભૂતપૂર્વ ઓસ્ટ્રેલિયન ક્રિકેટર બ્રેડ હોગનું માનવું છે કે વિરાટ કોહલીએ ટી-20 આંતરરાષ્ટ્રીય અને આરસીબીની કેપ્ટનશીપ છોડી સચિન તેંડુલકરની 51 ટેસ્ટ સદીની બરાબરીની સિદ્ધિ પર ધ્યાન કેન્દ્રિત કર્યું. પોતાની યુટ્યુબ ચેનલ પર વાત કરતા હોગે કહ્યું કે વિરાટ કોહલીએ ટી 20 આંતરરાષ્ટ્રીય અને આરસીબીના કેપ્ટન પદ છોડવાનો નિર્ણય કર્યો છે. કોહલી રમતના લાંબા ફોર્મેટ પર ધ્યાન કેન્દ્રિત કરી રહ્યો છે. તે વનડે અને ટેસ્ટ ક્રિકેટમાં ભારતનું કેપ્ટન બનવા માંગે છે. પરંતુ તે માસ્ટર બ્લાસ્ટર સચિન તેંડુલકરની 100 આંતરરાષ્ટ્રીય સદી સાથે મેચ કરવાનો પ્રયાસ કરી રહ્યો છે.
હોગે કહ્યું કે વિરાટ કોહલી વનડે ક્રિકેટમાં સચિન તેંડુલકરના રેકોર્ડની ખૂબ નજીક છે. કોહલીએ વનડેમાં 43 સદી ફટકારી છે. પરંતુ તે ટેસ્ટમાં સચિન કરતા ઘણો પાછળ છે. કોહલીએ ટેસ્ટમાં માત્ર 27 સદી ફટકારી છે. સચિને 200 મેચમાં 51 ટેસ્ટ સદી ફટકારી છે.