ગુરુવારે રાત્રે ગુજરાત ટાઇટન્સની જીતમાં ટીમના ફિનિશર્સ ડેવિડ મિલર અને રાહુલ તેવટિયા ફરી એકવાર અણનમ પેવેલિયન પરત ફર્યા હતા. પંજાબે આપેલા 154 રનના લક્ષ્યાંકને ગુજરાતે 1 બોલ અને 6 વિકેટ બાકી રાખીને હાંસલ કરી લીધો હતો.
આ સફળ રન ચેઝમાં ડેવિડ મિલરે વિરાટ કોહલી અને એબી ડી વિલિયર્સનો મોટો રેકોર્ડ તોડી નાખ્યો છે. આ રન ચેઝમાં મિલર 18 બોલમાં 1 ફોરની મદદથી 17 રન બનાવીને પેવેલિયન પરત ફર્યો હતો. IPLમાં આ 20મી વખત બન્યું છે જ્યારે રનનો સફળ પીછો કરીને અણનમ પેવેલિયન પરત ફર્યા છે, જ્યારે વિરાટ કોહલી અને એબી ડી વિલિયર્સે 19-19 વખત આ કારનામું કર્યું છે.
IPLના ઈતિહાસમાં સફળ રન ચેઝમાં સૌથી વધુ વખત અણનમ રહીને પેવેલિયન પરત ફરવાનો રેકોર્ડ ચેન્નાઈ સુપર કિંગ્સના કેપ્ટન મહેન્દ્ર સિંહ ધોનીના નામે છે. ધોનીએ તેની કારકિર્દીમાં 26 વખત આ કારનામું કર્યું છે, જેના કારણે તેની ગણતરી આજે પણ વિશ્વના શ્રેષ્ઠ ફિનિશરોમાં થાય છે. આ યાદીમાં રવિન્દ્ર જાડેજા (25) બીજા, યુસુફ પઠાણ (22) અને દિનેશ કાર્તિક (22) સંયુક્ત રીતે ત્રીજા અને ડેવિડ મિલર ચોથા ક્રમે છે.
સફળ IPL રનમાં સૌથી વધુ અણનમ ઇનિંગ્સનો રેકોર્ડ
26 વખત – એમએસ ધોની
25 વખત – રવિન્દ્ર જાડેજા
22 વખત – યુસુફ પઠાણ
22 વખત – દિનેશ કાર્તિક
20 વખત – ડેવિડ મિલર*
20 વખત – ડ્વેન બ્રાવો
19 વખત – વિરાટ કોહલી
19 વખત – એબી ડી વિલિયર્સ
19 વખત – સુરેશ રૈના
18 વખત – રોહિત શર્મા
17 વખત – કિરોન પોલાર્ડ
આ મેચમાં હાર્દિક પંડ્યાએ ટોસ જીતીને પ્રથમ બોલિંગ કરવાનો નિર્ણય કર્યો હતો. પોતાના નિર્ણયને સાચો સાબિત કરતા ટીમના બોલરોએ પંજાબને નિર્ધારિત 20 ઓવરમાં 153ના સ્કોર સુધી રોકી દીધું હતું.
ટાર્ગેટનો પીછો કરવા ઉતરેલી ગુજરાતની ટીમ માટે શુભમન ગિલે શાનદાર અડધી સદી ફટકારી અને 67 રન બનાવ્યા, જ્યારે રાહુલ તેવટિયા અને ડેવિડ મિલરની જોડીએ વિજયને અંતિમ સ્પર્શ આપ્યો.