કોહલી અને ધવનને પાછળ છોડી ડેવિડ વોર્નર સૌથી ઝડપી છ હજાર પૂરા કર્યા

ડેવિડ વોર્નરની આગેવાની હેઠળની દિલ્હી કેપિટલ્સ (DC) IPL 2023માં બીજી મેચ હારી ગઈ. દિલ્હીને શનિવારે રાજસ્થાન રોયલ્સ (RR)ના હાથે 57 રને હારનો સામનો કરવો પડ્યો, જે ટૂર્નામેન્ટમાં તેની સતત ત્રીજી હાર છે.

આરઆરની સામે વોર્નરે 55 બોલમાં 7 ચોગ્ગાની મદદથી 65 રનની ઇનિંગ રમી હતી. આ તેની IPL કરિયરની 57મી અડધી સદી છે. ભલે વોર્નરની ઈનિંગ દિલ્હી માટે કામની ન થઈ, પરંતુ તેણે એક મોટો રેકોર્ડ પોતાના નામે કરી લીધો.

વોર્નર (6039) IPLમાં સૌથી ઝડપી છ હજાર રન કરનાર ખેલાડી બની ગયો છે. તેણે અનુભવી બેટ્સમેન વિરાટ કોહલી અને શિખર ધવનને પાછળ છોડી દીધા છે. વોર્નર 165 ઇનિંગ્સમાં છ હજાર જ્યારે કોહલીએ 188 ઇનિંગ્સમાં આ આંકડો પાર કર્યો હતો. ધવને 199 ઇનિંગ્સમાં છ હજાર રન પૂરા કર્યા. જણાવી દઈએ કે વોર્નર IPLમાં છ હજાર રન પૂરા કરનાર પ્રથમ વિદેશી અને એકંદરે ત્રીજો ખેલાડી છે. કોહલી (225 મેચમાં 6727) ટૂર્નામેન્ટમાં સૌથી વધુ રન બનાવનાર ખેલાડી છે. તેના પછી ધવન (208 મેચમાં 6369)નો નંબર આવે છે.

આરઆર અને ડીસી વચ્ચેની મેચની વાત કરીએ તો ગુવાહાટીના બરસાપારા સ્ટેડિયમમાં વોર્નર બ્રિગેડ ખરાબ રીતે ફ્લોપ રહી હતી. આરઆર બેટ્સમેનોએ 199/4નો વિશાળ સ્કોર પોસ્ટ કરવા માટે ડીસી બોલરોને ફાડી નાખ્યા. લક્ષ્યનો પીછો કરવા ઉતરેલી દિલ્હીની શરૂઆત નિરાશાજનક રહી હતી. ટ્રેન્ટ બોલ્ટે પ્રથમ ઓવરમાં પૃથ્વી શો અને મનીષ પાંડેને શૂન્ય રને આઉટ કર્યા હતા. વોર્નર સિવાય માત્ર લલિત યાદવ (38) જ અદભૂત પ્રદર્શન કરી શક્યો હતો.