રાજસ્થાન રોયલ્સનો સ્ટાર સ્પિનર યુઝવેન્દ્ર ચહલ IPL 2022માં શાનદાર ફોર્મમાં જોવા મળી રહ્યો છે. આ સિઝનમાં ચહલ 23 વિકેટ સાથે સૌથી વધુ વિકેટ લેનાર બોલરોની યાદીમાં ટોચ પર છે. દિલ્હી કેપિટલ્સ સામેની મેચમાં ચહલને મિચેલ માર્શના રૂપમાં એકમાત્ર વિકેટ મળી હતી, જોકે તેની ટીમ મેચ જીતી શકી ન હતી. આ મેચમાં રાજસ્થાન રોયલ્સને 8 વિકેટથી હારનો સામનો કરવો પડ્યો હતો, પરંતુ માર્શની વિકેટ સાથે ચહલે પાકિસ્તાનના સોહેલ તનવીરનો 14 વર્ષ જૂનો રેકોર્ડ તોડી નાખ્યો હતો.
રાજસ્થાન રોયલ્સ માટે એક સિઝનમાં સૌથી વધુ વિકેટ લેવાના મામલે યુઝવેન્દ્ર ચહલે પાકિસ્તાનના સોહેલ તનવીરને પાછળ છોડી દીધો છે. તનવીરે પ્રથમ સિઝનમાં 22 વિકેટ લીધી હતી જ્યારે ચહલે આઈપીએલ 2022માં માર્શની વિકેટ સાથે 23 વિકેટ ઝડપી હતી. ચહલનું લક્ષ્ય હવે જેમ્સ ફોકનરનો રેકોર્ડ હશે, જેણે 2013માં આ ટીમ માટે 28 વિકેટ લીધી હતી. ચહલને આ સિઝનમાં વધુ બે લીગ મેચ રમવાની છે, પ્લેઓફમાં રાજસ્થાન પહોંચવાની પૂરી સંભાવના છે, તેથી તે ડ્વેન બ્રાવો અને હર્ષલ પટેલનો 32 વિકેટનો રેકોર્ડ પણ તોડી શકે છે. તમને જણાવી દઈએ કે, આ બે બોલરોના નામે IPLની એક સિઝનમાં સૌથી વધુ વિકેટ લેવાનો રેકોર્ડ છે.
દિલ્હી કેપિટલ્સ સામે કારમી હાર છતાં સંજુ સેમસનની ટીમ પોઈન્ટ ટેબલમાં ત્રીજા સ્થાને છે. 12માંથી 7 મેચ જીતી ચૂકેલી રાજસ્થાન રોયલ્સે જો કોઈ પણ મુશ્કેલી વિના પ્લેઓફ માટે ક્વોલિફાય કરવું હોય તો કોઈપણ સંજોગોમાં આગામી બે મેચ જીતવી પડશે. જો ટીમ આમ કરવામાં નિષ્ફળ જાય તો મામલો નેટ રન રેટ પર અટકી શકે છે.