આઈપીએલ 2023 આજથી શરૂ થઈ ગઈ છે. આ વખતે તમામની નજર હાર્દિક પંડ્યા પર રહેશે, જેણે પોતાની ડેબ્યૂ સિઝનમાં જ ગુજરાતની ટીમને ચેમ્પિયન બનાવ્યું હતું.
ગત સિઝનમાં, હાર્દિક પંડ્યાએ કેપ્ટન તરીકે શાનદાર પ્રદર્શન કરતા બોલ અને બેટથી અજાયબીઓ કરી હતી. હવે IPL 2023ની શરૂઆત પહેલા દક્ષિણ આફ્રિકાના પૂર્વ કેપ્ટન અને અનુભવી બેટ્સમેન એબી ડી વિલિયર્સે પંડ્યાને લઈને મોટું નિવેદન આપ્યું છે.
ડી વિલિયર્સે પોતાના નિવેદનમાં હાર્દિક પંડ્યાના બેટિંગ ઓર્ડર વિશે જણાવ્યું હતું. તેણે કહ્યું કે ‘મારા મતે હાર્દિક પંડ્યા માટે ચોથા નંબર પર બેટિંગ કરવું થોડું વહેલું છે, હું તેને 5 કે 6 નંબર પર રાખવા માગું છું, પરંતુ મને લાગે છે કે 5 નંબર તેના માટે પરફેક્ટ ઓર્ડર છે. જો તે જમણે-ડાબે (સંયોજન) અને મેચની સ્થિતિ સાથે સંતુલન બનાવી શકે છે, તો મને નથી લાગતું કે તેમના માટે આનાથી વધુ સારો ઓર્ડર છે.
દક્ષિણ આફ્રિકાના દિગ્ગજ ડી વિલિયર્સનું માનવું છે કે ગુજરાત ટાઇટન્સ પાસે આ સિઝનમાં મિડલ ઓર્ડરમાં ડેવિડ મિલર અને ડાબા હાથના બેટ્સમેન રાહુલ તેવટિયા જેવા સ્ટ્રોમટ્રૂપર્સ છે. આવી સ્થિતિમાં, આ બંનેને અલગ કરવા માટે હાર્દિક પંડ્યા મધ્યમાં 5માં નંબર પર આવે તે યોગ્ય રહેશે.
ગત સિઝનની વાત કરીએ તો હાર્દિક પંડ્યાની કેપ્ટન્સીમાં ગુજરાતને ચેમ્પિયન બનાવ્યું હતું. તેણે પોતાની ટીમ માટે સૌથી વધુ રન બનાવ્યા હતા. 15 મેચમાં પંડ્યાએ 44.27ની એવરેજથી 487 રન બનાવ્યા હતા. તેણે 12 મેચમાં ચોથા નંબર પર બેટિંગ કરી હતી. આ દરમિયાન 350થી વધુ રન બનાવ્યા હતા. આ વખતે પંડ્યા કયા નંબર પર બેટિંગ કરે છે તે જોવું રસપ્રદ રહેશે.