IPL 2022ની ફાઇનલમાં રાજસ્થાન રોયલ્સે ગુજરાત ટાઇટન્સ સામે 131 રનનો ટાર્ગેટ આપ્યો હતો, જેને હાર્દિકની ટીમે 18.1 ઓવરમાં ત્રણ વિકેટ ગુમાવીને હાંસલ કરી લીધો હતો. ટોસ જીતીને પ્રથમ બેટિંગ કરતા રાજસ્થાને 20 ઓવરમાં નવ વિકેટ ગુમાવીને 130 રન બનાવ્યા હતા.
ગુજરાતના કેપ્ટન હાર્દિકે ફાઈનલમાં રાજસ્થાન માટે મુશ્કેલી ઊભી કરી હતી. તેણે ફાઈનલ મેચમાં બોલિંગ કરી અને આઈપીએલ ઈતિહાસમાં તેનું સર્વશ્રેષ્ઠ પ્રદર્શન કર્યું.
હાર્દિકે મેચમાં ચાર ઓવરમાં 17 રન આપીને ત્રણ વિકેટ ઝડપી હતી. આ દરમિયાન તેણે 4.20ની ઈકોનોમી પર રન આપ્યા હતા. હાર્દિકે પહેલા જોસ બટલરને વિકેટકીપર રિદ્ધિમાન સાહાના હાથે કેચ કરાવ્યો હતો. ત્યારબાદ રાજસ્થાનના કેપ્ટન સંજુ સેમસનને સાઈ કિશોરના હાથે કેચ આઉટ કરાવ્યો હતો.
આ પછી હાર્દિકે પોતાના જ બોલ પર શિમરોન હેટમાયરનો કેચ પકડ્યો હતો. બટલર 39 રન, સેમસન 14 રન અને હેટમાયર 11 રન બનાવી શક્યો હતો. આ રીતે હાર્દિકે સૌથી મહત્વપૂર્ણ મેચમાં વિપક્ષી ટીમના સૌથી મહત્વપૂર્ણ બેટ્સમેનોને પેવેલિયન મોકલી દીધા હતા. 17 રનમાં ત્રણ વિકેટ તેની IPL કરિયરની સર્વશ્રેષ્ઠ બોલિંગ છે.
હેટમાયરના આઉટ થતાની સાથે જ હાર્દિકે આઈપીએલમાં 50 વિકેટ પણ પૂરી કરી લીધી હતી. આવું કરનાર તે લીગનો 59મો બોલર છે. IPLમાં સૌથી વધુ વિકેટ લેવાનો રેકોર્ડ ડ્વેન બ્રાવોના નામે છે. તેણે 161 મેચમાં 183 વિકેટ લીધી છે. હાર્દિકે પણ શાનદાર બેટિંગ બતાવી અને 30 બોલમાં 34 રન બનાવ્યા. જેમાં ત્રણ ચોગ્ગા અને એક છગ્ગાનો સમાવેશ થાય છે. તેણે શુભમન ગિલ સાથે 63 રનની મહત્વપૂર્ણ ભાગીદારી રમી હતી.