આઈપીએલમાં બે નવી ટીમોની શરૂઆત થઈ છે. સોમવારે, બંને નવી ટીમો – લખનૌ અને ગુજરાત – મુંબઈના વાનખેડે સ્ટેડિયમમાં ટકરાયા હતા. આ મેચમાં ગુજરાત ટાઇટન્સે 5 વિકેટની રોમાંચક જીત નોંધાવીને IPL સફરની શરૂઆત કરી હતી.
IPLની નવી ટીમ ગુજરાત ટાઈટન્સના કેપ્ટન હાર્દિક પંડ્યાએ લખનૌ સુપર જાયન્ટ્સ સામેની જીત બાદ કહ્યું કે, તે આ વખતે કઈ માનસિકતા અને વિચાર સાથે ટૂર્નામેન્ટ રમવા આવ્યો છે. તેના મતે તે બેટિંગમાં વધુ જવાબદારી નિભાવવા માંગે છે. ICC T20 વર્લ્ડ કપ પછી પ્રથમ વખત સ્પર્ધાત્મક ક્રિકેટ રમી રહેલા હાર્દિકે લખનૌ સામેની આ મેચમાં ચોથા નંબર પર બેટિંગ કરી અને 28 બોલમાં 33 રન બનાવ્યા. તે જ સમયે, બોલિંગમાં કોઈ સફળતા વિના, તેણે ચાર ઓવરનો ક્વોટા પણ પૂરો કર્યો.
પ્રથમ બેટિંગ કરતા લખનૌ સુપર જાયન્ટ્સે પાંચ વિકેટે 158 રન બનાવ્યા હતા પરંતુ ગુજરાતે બે બોલ બાકી રહેતા લક્ષ્યનો પીછો કરી લીધો હતો. મેચ પછીના એવોર્ડ સમારોહમાં ચોથા ક્રમમાં બેટિંગ વિશે પૂછવામાં આવતા પંડ્યાએ કહ્યું, “હું બેટ્સમેન તરીકે વધુ જવાબદારી લેવા માંગુ છું. અમારી આ જીતમાં ટીમના દરેક સભ્યોએ પોતાની ભૂમિકા ભજવી હતી.
આ સિવાય કેપ્ટન હાર્દિક પંડ્યાએ ‘મેન ઓફ ધ મેચ’ મોહમ્મદ શમીની પ્રશંસા કરતા કહ્યું, “જ્યારે વિકેટ તમને થોડી મદદ કરે છે, ત્યારે શમી ખરેખર ખતરનાક બની જાય છે. તેણે અમને શાનદાર શરૂઆત અપાવી.” મોહમ્મદ શમીએ મેચમાં 25 રન આપીને 3 વિકેટ લીધી હતી.