કોલકાતા નાઈટ રાઈડર્સની ટીમ આઈપીએલ 2022માં પ્લેઓફમાં જગ્યા બનાવવા માટે સંઘર્ષ કરી રહી છે, તો બીજી તરફ આ ટીમનો ઓપનર બેટ્સમેન અજિંક્ય રહાણે ઈજાગ્રસ્ત થયો છે.
રહાણેને હેમસ્ટ્રિંગમાં ઈજા થઈ છે અને તેના કારણે તે આઈપીએલ 2022માંથી બહાર થઈ ગયો છે એટલે કે હવે તે તેની ટીમ માટે બાકી રહેલી આગામી માત્ર લીગ મેચોમાં રમી શકશે નહીં. KKR આઈપીએલમાં અત્યાર સુધીમાં કુલ 13 મેચ રમી છે જેમાંથી તેણે 6 મેચ જીતી છે જ્યારે 7 મેચમાં હારનો સામનો કરવો પડ્યો છે. જ્યારે 6 મેચ જીતીને આ ટીમ 12 પોઈન્ટ સાથે છઠ્ઠા સ્થાન પર છે.
IPL 2022 ના અંત પછી, ભારતીય ક્રિકેટ ટીમ દક્ષિણ આફ્રિકા સામે T20 શ્રેણી રમશે અને તે પછી ટીમ ઈન્ડિયા ઈંગ્લેન્ડ જશે જ્યાં તેણે ટેસ્ટ શ્રેણી ઉપરાંત ODI અને T20 શ્રેણીમાં ભાગ લેવાની છે. હવે માનવામાં આવી રહ્યું છે કે આ ઈજાના કારણે રહાણે ઈંગ્લેન્ડ પ્રવાસ માટે ઉપલબ્ધ નહીં હોય. જોકે IPL પહેલા શ્રીલંકા સામેની હોમ ટેસ્ટ સિરીઝ માટે રહાણેની ભારતીય ટીમમાં પસંદગી કરવામાં આવી ન હતી. IPLમાં હૈદરાબાદ સામે રમાયેલી મેચ દરમિયાન રહાણેને ગ્રેડ-3 હેમસ્ટ્રિંગમાં ઈજા થઈ હતી.
IPL 2022 અજિંક્ય રહાણે માટે બહુ સારું રહ્યું ન હતું અને તેને અત્યાર સુધી રમાયેલી 13 મેચોમાંથી 7 મેચમાં રમવાની તક મળી હતી. તે કોલકાતા માટે ઓપનરની જવાબદારી નિભાવી રહ્યો હતો અને તેણે 7 મેચમાં માત્ર 19ની એવરેજથી 133 રન બનાવ્યા હતા. આ સિઝનમાં તેણે અડધી સદી પણ ફટકારી ન હતી અને તેનો સર્વશ્રેષ્ઠ સ્કોર 44 રન હતો અને તેનો સ્ટ્રાઈક રેટ 103.91 હતો. તે જ સમયે, રહાણેએ IPLમાં 158 મેચમાં 4074 રન બનાવ્યા છે, જેમાં 2 સદી અને 28 અડધી સદી સામેલ છે.