ઈન્ડિયન પ્રીમિયર લીગ (IPL) 2023 માં બુધવારે રોયલ ચેલેન્જર્સ બેંગ્લોર વિ કોલકાતા નાઈટ રાઈડર્સ (RCB vs KKR) મેચ રમાઈ હતી. બેંગલુરુના એમ ચિન્નાસ્વામી સ્ટેડિયમમાં RCBને KKR સામે 21 રને હારનો સામનો કરવો પડ્યો હતો.
ફાફ ડુ પ્લેસિસ, વિરાટ કોહલી અને ગ્લેન મેક્સવેલે આ સમગ્ર સિઝનમાં RCB માટે અત્યાર સુધીમાં સૌથી વધુ રન બનાવ્યા છે. ફાફ અને મેક્સવેલ RCB તરફથી KKR સામે ચાલ્યા ન હતા જેના કારણે યજમાનોને નુકસાન ચુકવવું પડ્યું હતું. IPL 2022માં RCB માટે હીરો બનેલા અને ફિનિશરની ભૂમિકા મજબૂત રીતે ભજવનાર દિનેશ કાર્તિક આ સિઝનમાં અત્યાર સુધી ટીમ માટે વિલન સાબિત થયો છે. દિનેશ કાર્તિકના આંકડા પણ આ વાતની સાક્ષી પૂરે છે. દિનેશ કાર્તિકે ગત સિઝનમાં ડેથ ઓવરોમાં જોરદાર બેટિંગ કરી હતી.
2022માં ડેથ ઓવર્સમાં દિનેશ કાર્તિકે 207.44ના સ્ટ્રાઈક રેટ અને 83.67ની એવરેજથી રન બનાવ્યા હતા. આ સિઝનમાં ડેથ ઓવરોમાં દિનેશ કાર્તિકે માત્ર 10.60ની એવરેજ અને 145.90ના સ્ટ્રાઈક રેટથી રન બનાવ્યા છે. ગત સિઝનમાં આરસીબીને પ્લેઓફમાં લઈ જવામાં દિનેશ કાર્તિકની ભૂમિકા ખૂબ મહત્વની હતી, પરંતુ આ સિઝનમાં તે એક પછી એક મેચમાં ફ્લોપ થઈ રહ્યો છે. KKR સામેની મેચમાં તેને ફરી એકવાર હીરો બનવાની તક મળી હતી, પરંતુ તે 18 બોલમાં 22 રન બનાવીને આઉટ થઈ ગયો હતો.
KKRએ RCBને જીતવા માટે 201 રનનો ટાર્ગેટ આપ્યો હતો, પરંતુ RCBની ટીમ 20 ઓવરમાં આઠ વિકેટે 179 રન જ બનાવી શકી હતી. આ સીઝનમાં આરસીબી અને કેકેઆર વચ્ચે રમાયેલી આ બીજી મેચ હતી અને બંને વખત ટીમને હારનો સામનો કરવો પડ્યો હતો.