આખરે ચાર મેચ બાદ નવા કેપ્ટન રવિન્દ્ર જાડેજાના નેતૃત્વમાં ચેન્નાઈની ટીમે પ્રથમ વિજયનો સ્વાદ ચાખ્યો. બેંગ્લોર સામેની મેચમાં પ્રથમ બેટિંગ કરતા CSKના બેટ્સમેને શાનદાર બેટિંગ કરી અને 216 રનનો વિશાળ સ્કોર બનાવ્યો, જેના જવાબમાં RCBની ટીમ નિર્ધારિત ઓવરમાં 9 વિકેટે 193 રન જ બનાવી શકી અને ચેન્નાઈએ આ મેચ 23 રને જીતી લીધી.
આ મેચમાં CSKએ તેમની બેટિંગની સાથે બોલિંગમાં પણ સુધારો કર્યો હતો. CSKના કેપ્ટન રવિન્દ્ર જાડેજાએ આ મેચમાં 4 ઓવરમાં 39 રન આપીને 3 વિકેટ લીધી હતી, જોકે તે બેટિંગમાં કોઈ રન બનાવ્યા વિના આઉટ થઈ ગયો હતો.
આ પ્રદર્શન સાથે જાડેજાએ RCB સામે સૌથી વધુ વિકેટ લેવાનો રેકોર્ડ બનાવ્યો છે. હવે તેની પાસે RCB સામે 26 વિકેટ છે અને તે કોઈપણ એક ફ્રેન્ચાઈઝી સામે સૌથી સફળ બોલર બની ગયો છે. આ યાદીમાં જસપ્રિત બુમરાહ અને આશિષ નેહરા જેવા બોલરોના નામ પણ સામેલ છે. બુમરાહના ખાતામાં 24 જ્યારે નેહરાના ખાતામાં 23 વિકેટ છે.
RCB સામેની મેચની વાત કરીએ તો ચેન્નાઈને આ મેચમાં કોઈ પણ સંજોગોમાં જીતની જરૂર હતી. ટીમનો પાયો નાખનાર શિવમ દુબે અને રોબિન ઉથપ્પાએ ત્રીજી વિકેટ માટે 165 રનની ભાગીદારી કરી અને 216 રનના વિશાળ સ્કોરનું યોગદાન આપ્યું. ઉથપ્પાએ 50 બોલમાં 88 રન બનાવ્યા જ્યારે દુબેએ 46 બોલમાં 95 રન બનાવ્યા. જ્યારે દુબે અને ઉથપ્પાએ બેટિંગમાં જવાબદારી લીધી હતી જ્યારે બોલિંગમાં મહેશ તિક્ષાએ 4 વિકેટ લઈને ચેન્નાઈને પ્રથમ જીત અપાવી હતી. ચેન્નાઈની આગામી મેચ 17 એપ્રિલે નવી ટીમ ગુજરાત ટાઇટન્સ સામે થશે.