ભારતીય સ્પિનર કુલદીપ યાદવ ‘ગ્રોઈન’ ઈજામાંથી સાજો થઈ રહ્યો છે અને તેને સાવચેતીના પગલા તરીકે ચાલી રહેલી ઈન્ડિયન પ્રીમિયર લીગમાં દિલ્હી કેપિટલ્સ ટીમ મેનેજમેન્ટ દ્વારા આરામની સલાહ આપવામાં આવી છે.
ડાબા હાથના સ્પિનર કુલદીપને જયપુરમાં રાજસ્થાન રોયલ્સ સામે દિલ્હી કેપિટલ્સની સિઝનની બીજી મેચમાં ઈજા થઈ હતી, જેમાં ટીમને હારનો સામનો કરવો પડ્યો હતો.
આનાથી 29 વર્ષીય ખેલાડીને આગામી મેચોમાંથી બહાર રહેવાની ફરજ પડી જેમાં અનુભવી ઝડપી બોલર ઈશાંત શર્માએ પ્લેઈંગ ઈલેવનમાં પુનરાગમન કર્યું. જ્યારે આઈપીએલના એક સ્ત્રોતને કુલદીપની સ્થિતિ વિશે પૂછવામાં આવ્યું ત્યારે તેણે પીટીઆઈને કહ્યું કે તેને મેચ ફીટ થવામાં થોડો સમય લાગશે.
કુલદીપ સેન્ટ્રલ કોન્ટ્રાક્ટેડ ખેલાડી છે અને T20 વર્લ્ડ કપ ટીમનો દાવેદાર છે, તેથી તેની ઈજા અને ‘રિહેબ’ મેનેજમેન્ટમાં નેશનલ ક્રિકેટ એકેડમી (NCA)ની સ્પોર્ટ્સ સાયન્સ અને મેડિકલ ટીમની સલાહ મહત્વપૂર્ણ રહેશે. IPL ફ્રેન્ચાઇઝીઓ માટે ભારતીય ખેલાડીઓની ઇજાઓ અને ઇજા સંબંધિત ચિંતાઓ વિશે NCAને જાણ કરવી ફરજિયાત છે.
જો કે, કુલદીપ તમામ મેચો માટે ટીમ સાથે પ્રવાસ કરી રહ્યો છે અને રવિવારે મુંબઈ ઈન્ડિયન્સ સામે દિલ્હી કેપિટલ્સની આગામી મેચમાં તેની ભાગીદારી અંગે શંકા છે. કુલદીપે બે મેચમાં 7.62ની ઈકોનોમી સાથે ત્રણ વિકેટ લીધી છે. તેણે ઈંગ્લેન્ડ સામેની પાંચ ટેસ્ટ મેચની શ્રેણીમાં શાનદાર પ્રદર્શન કરીને 19 વિકેટ ઝડપી હતી.