IPL 2023ની 8મી મેચમાં પંજાબ કિંગ્સે બુધવારે રાત્રે રાજસ્થાન રોયલ્સ સામે રોમાંચક જીત નોંધાવી હતી. કેપ્ટન શિખર ધવનની 86 રનની અણનમ ઇનિંગના કારણે પંજાબે પ્રથમ બેટિંગ કરતા 197 રન બનાવ્યા હતા.
આ જ મેચમાં ભારતીય સ્પિનર યુઝવેન્દ્ર ચહલે પણ શાનદાર પ્રદર્શન કર્યું હતું. ચહલ પંજાબ કિંગ્સ સામે મોંઘો સાબિત થયો હતો પરંતુ તેણે વિકેટ લેતા જ અનુભવી બોલર લસિથ મલિંગાનો મોટો રેકોર્ડ તોડી નાખ્યો હતો. ચહલ હવે IPLના ઈતિહાસમાં સૌથી વધુ વિકેટ લેનારા બોલરોની યાદીમાં બીજા સ્થાને પહોંચી ગયો છે.
યુઝવેન્દ્ર ચહલે પંજાબ કિંગ્સના જીતેશ શર્માને આઉટ કરીને આ સિદ્ધિ મેળવી હતી. ચહલે આઈપીએલમાં અત્યાર સુધીમાં 133 મેચ રમી છે જેમાં 16.9ના સ્ટ્રાઈક રેટ સાથે 171 વિકેટ લીધી છે. આ સાથે જ આ ટૂર્નામેન્ટમાં 170 વિકેટ લેવાનો રેકોર્ડ શ્રીલંકાના દિગ્ગજ ખેલાડી લસિથ મલિંગાના નામે હતો.
હવે IPLના ઈતિહાસમાં 183 વિકેટ લેવાનો રેકોર્ડ ધરાવનાર ચહલથી આગળ માત્ર ડ્વેન બ્રાવો બચ્યો છે. આશા છે કે ચહલ આ સિઝનમાં આ રેકોર્ડ તોડી નાખશે.