IPL 2022 રાજસ્થાન રોયલ્સના ઓપનર બેટ્સમેન જોસ બટલરે પોતાની બેટિંગથી બધાના દિલ જીતી લીધા છે. તે પોતાની ટીમ માટે એક જબરદસ્ત પર્ફોર્મર તરીકે ઉભરી આવ્યો છે, જેની બેટિંગ ક્રિકેટ ચાહકોનું ખૂબ જ મનોરંજન કરી રહી છે.
જો કે, આ સિઝનની 47મી મેચમાં બટલરનું બેટ KKR સામે વધુ ટકી શક્યું ન હતું અને તેણે પોતાની ટીમ માટે માત્ર 22 રન બનાવ્યા હતા. આ મેચમાં રાજસ્થાનનો 7 વિકેટે પરાજય થયો હતો, પરંતુ બટલર પોતાની ઇનિંગ્સના આધારે વિરાટ કોહલીનો રેકોર્ડ તોડવામાં સફળ રહ્યો હતો.
જોસ બટલરે KKR સામે 3 ચોગ્ગાની મદદથી 25 બોલમાં 22 રન બનાવ્યા અને આ ઇનિંગના આધારે IPL 2022ની પ્રથમ 10 ઇનિંગ્સમાં 588 રન બનાવ્યા. વાસ્તવમાં, IPLની એક સિઝનની પ્રથમ 10 ઇનિંગ્સમાં સૌથી વધુ રન બનાવવાનો રેકોર્ડ RCBના પૂર્વ કેપ્ટન વિરાટ કોહલીના નામે હતો. વિરાટ કોહલીએ 2016ની સિઝનમાં પ્રથમ 10 ઇનિંગ્સમાં 568 રન બનાવ્યા હતા. હવે જોસ બટલરે આ સિઝનની પ્રથમ 10 ઇનિંગ્સમાં 588 રન બનાવ્યા અને કોહલીને પાછળ છોડી દીધો. હવે IPLની એક સિઝનની પહેલી 10 ઇનિંગ્સમાં સૌથી વધુ રન બનાવવાનો રેકોર્ડ જોસ બટલરના નામે નોંધાયો છે.
જોસ બટલરે IPLની 15મી સીઝનમાં અત્યાર સુધી પોતાની ટીમ માટે ઘણા રન બનાવ્યા છે. અત્યાર સુધી રમાયેલી 10 મેચોની 10 ઇનિંગ્સમાં તેના બેટથી 65.33ની એવરેજથી 588 રન થયા છે. આ સમયગાળા દરમિયાન બટલરની સ્ટ્રાઈક રેટ 150.77 રહી છે. તેણે આ સિઝનમાં અત્યાર સુધીમાં 3 સદી અને 3 અડધી સદી ફટકારી છે, તેમજ તેના બેટથી 50 ચોગ્ગા અને 36 છગ્ગા ફટકાર્યા છે જ્યારે શ્રેષ્ઠ સ્કોર 116 રન છે.