કોલકાતા નાઈટ રાઈડર્સના ઓપનર જેસન રોયને રોયલ ચેલેન્જર્સ બેંગ્લોર સામેની મેચ બાદ બીસીસીઆઈએ તેની મેચ ફીના 10 ટકા દંડ ફટકાર્યો છે. ઇંગ્લેન્ડના આ ખેલાડીએ RCB સામેની મેચ દરમિયાન IPLની આચારસંહિતાનું ઉલ્લંઘન કર્યું હતું, જેના કારણે તેને દંડ ફટકારવામાં આવ્યો છે.
તમને જણાવી દઈએ કે, રોયે આ મેચમાં શાનદાર અડધી સદી ફટકારતા 29 બોલમાં 56 રનની ઇનિંગ રમી હતી. તેની ઇનિંગ્સના આધારે કેકેઆર 200ના સ્કોર સુધી પહોંચાડવામાં સફળ રહી હતી. કોલકાતાએ આ મેચ 21 રને જીતી લીધી હતી.
IPL દ્વારા જારી કરવામાં આવેલી પ્રેસ રિલીઝ અનુસાર ‘કોલકાતા નાઈટ રાઈડર્સના બેટ્સમેન જેસન રોયને ટાટા ઈન્ડિયન પ્રીમિયર લીગ (આઈપીએલ) 2023ની રોયલ ચેલેન્જર્સ બેંગ્લોર સામે એમ. ચિન્નાસ્વામી સ્ટેડિયમ, બેંગલુરુમાં રમાયેલી મેચ દરમિયાન આઈપીએલ આચાર સંહિતાના ભંગ બદલ મેચ ફીના 10% દંડ ફટકારવામાં આવ્યો હતો.
પ્રેસ રિલીઝમાં આગળ વાંચવામાં આવ્યું છે કે ‘રોયે IPL કોડ ઓફ કન્ડક્ટની કલમ 2.2 હેઠળ લેવલ 1નો ગુનો કબૂલ કર્યો છે. આચાર સંહિતાના લેવલ 1 ભંગ માટે, મેચ રેફરીનો નિર્ણય અંતિમ અને બંધનકર્તા છે.
તમારી જાણકારી માટે તમને જણાવી દઈએ કે આઈપીએલ આચાર સંહિતાની કલમ 2.2 મેચ દરમિયાન ક્રિકેટના સાધનો અથવા કપડા, ગ્રાઉન્ડ ઈક્વિપમેન્ટના દુરુપયોગ સાથે સંબંધિત છે.
મીડિયા રિપોર્ટ્સ અનુસાર, જેસન રોયે તેનું બેટ આઉટ થયા બાદ જમીન પર પડેલા બેલ પર વાગ્યું હતું, જેના કારણે તેને દંડ ફટકારવામાં આવ્યો છે. તમને જણાવી દઈએ કે, તે KKRની ઈનિંગની 10મી ઓવરના છેલ્લા બોલ પર વિજયકુમાર વૈશાક દ્વારા ક્લીન બોલ્ડ થયો હતો.