રોયલ ચેલેન્જર્સ બેંગ્લોર (RCB) એ IPL 2023ની જીતની શરૂઆત કરી છે. બેંગલુરુના ચિન્નાસ્વામી સ્ટેડિયમમાં RCBએ પાંચ વખતની ચેમ્પિયન મુંબઈ ઈન્ડિયન્સ (MI) ને 8 વિકેટથી હરાવ્યું.
MIએ 172 રનનો ટાર્ગેટ આપ્યો હતો, જેને RCBએ વિરાટ કોહલી અને કેપ્ટન ફાફ ડુપ્લેસીસની શાનદાર ઇનિંગ્સના આધારે સરળતાથી પીછો કરી લીધો હતો. કોહલી અને ડુપ્લેસીસ ઓપનર તરીકે મેદાનમાં ઉતર્યા હતા અને મુંબઈના બોલરોને જોરદાર રીતે રમ્યા હતા.
કોહલી અને ડુપ્લેસિસે પ્રથમ વિકેટ માટે 148 રનની ભાગીદારી કરી હતી. આ ભાગીદારી અરશદ ખાને 15મી ઓવરમાં ડુપ્લેસીસને આઉટ કરીને તોડી હતી. ડુપ્લેસિસે 43 બોલમાં 5 ચોગ્ગા અને 6 છગ્ગાની મદદથી 73 રનની ઇનિંગ રમી હતી. આ સાથે જ કોહલીએ 49 બોલમાં અણનમ 82 રન બનાવ્યા હતા. તેણે 6 ફોર અને 5 સિક્સર ફટકારી હતી. કોહલીએ છગ્ગો ફટકારીને આરસીબીને જીત અપાવી હતી.
કોહલી અને ડુપ્લેસિસે મુંબઈ સામે શાનદાર ભાગીદારી કરીને રેકોર્ડ બનાવ્યો છે. બંનેએ મુંબઈ સામે ચોથી સૌથી મોટી ઓપનિંગ ભાગીદારી કરી છે. તમને જણાવી દઈએ કે MI સામે સૌથી વધુ ઓપનિંગ ભાગીદારીનો રેકોર્ડ એડમ ગિલક્રિસ્ટ અને VVS લક્ષ્મણની જોડીના નામે છે. ગિલક્રિસ્ટ અને લક્ષ્મણે 2008માં ડીવાય પાટિલ સ્ટેડિયમમાં પ્રથમ વિકેટ માટે 155 રનની અતૂટ ભાગીદારી કરી હતી. બંને ત્યારે ડેક્કન ચાર્જર્સમાં હતા.
આ યાદીમાં બીજા સ્થાને ડેવિડ વોર્નર અને રિદ્ધિમાન સાહાની જોડી છે. બંનેએ 2020માં મુંબઈ સામે શારજાહના મેદાનમાં 151 રનની અતૂટ ભાગીદારી નોંધાવી હતી. આ યાદીમાં ત્રીજા સ્થાને મહેલા જયવર્દને અને વીરેન્દ્ર સેહવાગની ઓપનિંગ જોડી છે, જેણે 2013માં દિલ્હીના મેદાન પર 151 રન બનાવ્યા હતા. તે સમયે બંને દિલ્હીની ટીમનો ભાગ હતા.