ઇન્ડિયન પ્રીમિયર લીગ (IPL) 2023 ની મેચ બુધવારે લખનૌ સુપર જાયન્ટ્સ (LSG) અને રાજસ્થાન રોયલ્સ વચ્ચે રમાઈ હતી. ચાર વર્ષ પછી પ્રથમ વખત, જયપુરના સવાઈ માનસિંહ સ્ટેડિયમમાં IPL મેચ રમાઈ હતી, પરંતુ રાજસ્થાન રોયલ્સ તેમના ઘરઆંગણાના દર્શકોને વિજયની ભેટ આપી શક્યું ન હતું.
કેએલ રાહુલની કેપ્ટનશીપવાળી લખનૌ સુપર જાયન્ટ્સની ટીમે 10 રનથી જીત મેળવી હતી. એલએસજીએ મેચ જીતી હતી, પરંતુ કેપ્ટન કેએલ રાહુલને 12 લાખ રૂપિયાનો દંડ ફટકારવામાં આવ્યો હતો. વાસ્તવમાં, આ IPLમાં ધીમી ઓવર રેટના કારણે મેચ પૂર્ણ થવામાં વિલંબ થઈ રહ્યો છે, જે એક મોટી સમસ્યા બની રહી છે.
IPLએ એક નિવેદનમાં જણાવ્યું હતું કે, “વર્તમાન સિઝનમાં ધીમી ઓવર રેટને લગતો IPL આચાર સંહિતા હેઠળ આ ટીમનો પ્રથમ ગુનો છે અને તેથી કેપ્ટન રાહુલને 12 લાખ રૂપિયાનો દંડ ફટકારવામાં આવ્યો છે.” IPL ત્રણ કલાક અને 20 મિનિટમાં મેચો સમાપ્ત કરવાનું લક્ષ્ય રાખે છે પરંતુ ધીમી ઓવર-રેટ મેચો ચાર કલાકથી વધુ સમય સુધી લંબાવવાથી એક મુદ્દો બની રહી છે.
પ્રથમ બેટિંગ કરતા એલએસજીએ 20 ઓવરમાં સાત વિકેટે 154 રન બનાવ્યા હતા જેના જવાબમાં રાજસ્થાન રોયલ્સ 20 ઓવરમાં છ વિકેટે 144 રન જ બનાવી શકી હતી. એલએસજીના બોલરોએ આગામી મેચોમાં સાવચેત રહેવાની જરૂર છે કારણ કે જો આવું વારંવાર થશે તો કેએલ રાહુલને પ્રતિબંધનો સામનો કરવો પડી શકે છે.