IPLમાં પોતાની ગતિથી સનસનાટી મચાવનાર લખનૌ સુપર જાયન્ટ્સ (LSG)ના યુવા ઝડપી બોલર મયંક યાદવે ચોંકાવનારું નિવેદન આપ્યું છે. તેણે કહ્યું છે કે તે વિશ્વનો સૌથી ઝડપી બોલર બનવા માંગતો નથી.
યુવા ઝડપી બોલર મયંક યાદવે IPL 2024માં પંજાબ કિંગ્સ સામે રમાયેલી મેચમાં લખનૌ સુપર જાયન્ટ્સ માટે ડેબ્યૂ કર્યું હતું. તેણે પહેલી જ મેચમાં પોતાની ગતિથી સનસનાટી મચાવી દીધી હતી. મયંક યાદવે IPL 2024નો સૌથી ઝડપી બોલ ફેંક્યો અને પોતાની સ્પીડથી બધાને ચોંકાવી દીધા. પંજાબ કિંગ્સની ઇનિંગ દરમિયાન, મયંક યાદવે 12મી ઓવરનો પહેલો બોલ 155.8 kmphની ઝડપે ફેંક્યો અને IPL 2024માં સૌથી ઝડપી બોલ ફેંકવાનો રેકોર્ડ પણ બનાવ્યો.
આ મેચ બાદ એક તરફ મયંક યાદવની ગતિની દરેક જગ્યાએ ચર્ચા થઈ રહી છે તો બીજી તરફ મયંક યાદવે નિવેદન આપ્યું છે કે સૌથી ઝડપી બોલર બનવું તેનું લક્ષ્ય નથી.
ટાઈમ્સ ઓફ ઈન્ડિયા સાથે વાત કરતા તેણે કહ્યું કે, હું ક્યારેય દુનિયાનો સૌથી ઝડપી બોલર બનવા માંગતો ન હતો. મેં ક્યારેય તેનું સ્વપ્ન જોયું ન હતું. હું વિશ્વ ક્રિકેટમાં સૌથી ઝડપી બોલર બનવા માંગતો નથી. હું માત્ર વિશ્વનો સર્વશ્રેષ્ઠ બોલર બનવા માંગુ છું. હું ઓછામાં ઓછા રન આપવા માંગુ છું અને મારા પ્રદર્શનમાં તે સાતત્ય લાવવા માંગુ છું. મારા માટે પેસ એક પ્લસ પોઈન્ટ છે પરંતુ અન્ય બાબતો પણ છે જેમ કે લાઇન-લેન્થ અને બોલને ક્યાં ફટકારવો. આ વસ્તુઓથી માત્ર પેસને ફાયદો થાય છે.