ભૂતપૂર્વ ભારતીય ક્રિકેટર મોહમ્મદ કૈફ માને છે કે ગુજરાત ટાઇટન્સના સુકાની હાર્દિક પંડ્યા ગઈકાલ વિશે વધુ વિચારતો નથી, જે તેની ટીમને હકારાત્મકતા આપે છે.
કૈફે સ્ટાર સ્પોર્ટ્સ પ્રોગ્રામ ક્રિકેટ લાઈવ પર કહ્યું, ‘હાર્દિક પંડ્યા એવો કેપ્ટન છે જે હંમેશા આગળનું વિચારે છે, તે ભૂતકાળ પર વધારે ધ્યાન નથી આપતો. તેઓ મેચ હારી ગયા અને તેમાંથી બહાર પણ આવ્યા. હવે તેઓ નવી મેચ માટે તૈયાર છે. આ ટીમ ખૂબ જ સકારાત્મક છે. આ ટીમ તેના સારા ફોર્મને જાળવી રાખવા માંગે છે કારણ કે જ્યારે તમે ટાઇટલ બચાવવા માટે રમો છો, ત્યારે તમારે સારું પ્રદર્શન કરવાની જરૂર છે.
જ્યારે કૈફે ડિફેન્ડિંગ ચેમ્પિયન ગુજરાતના કેપ્ટનના વખાણ કર્યા હતા, તો યુસુફ પઠાણે ડિફેન્ડિંગ રનર્સ-અપ રાજસ્થાન રોયલ્સના સુકાની સંજુ સેમસનના વખાણ કરતાં કહ્યું હતું કે તે રોયલ્સની શાનદાર આગેવાની કરી રહ્યો છે. યુસુફે કહ્યું, ‘રાજસ્થાન રોયલ્સ IPL 2023માં ખૂબ જ મજબૂત ટીમ દેખાઈ રહી છે. આ ટીમ આ સિઝનમાં પણ શાનદાર ક્રિકેટ રમી રહી છે. તેની બેટિંગ ખૂબ જ મજબૂત લાગી રહી છે. તેમની પાસે ગુણવત્તાયુક્ત બોલર છે. સંજુ સેમસન એક મહાન કેપ્ટનની જેમ ટીમનું નેતૃત્વ કરી રહ્યો છે.