ઈન્ડિયન પ્રીમિયર લીગની 15મી આવૃત્તિ 26 માર્ચથી શરૂ થઈ રહી છે. આ લીગના ઈતિહાસમાં એવા ઘણા પ્રસંગો બન્યા છે જ્યારે બે બેટ્સમેનોની જોડીએ બોલરોને જોરદાર માર માર્યો હોય. IPLમાં સૌથી મોટી ભાગીદારીનો રેકોર્ડ ભૂતપૂર્વ રોયલ ચેલેન્જર્સ બેંગ્લોર (RCB)ના કેપ્ટન વિરાટ કોહલી અને ભૂતપૂર્વ અનુભવી બેટ્સમેન એબી ડી વિલિયર્સના નામે છે.
વિરાટ કોહલી અને એબી ડી વિલિયર્સે 14 મે 2016ના રોજ બેંગ્લોરના એમ ચિન્નાસ્વામી સ્ટેડિયમ ખાતે ગુજરાત લાયન્સ સામે બીજી વિકેટ માટે 229 રનની ભાગીદારી કરી હતી. રનના મામલામાં આ IPLની સૌથી મોટી ભાગીદારી છે. આ મેચમાં વિરાટે 55 બોલમાં 109 રન બનાવ્યા હતા જ્યારે ડી વિલિયર્સે 52 બોલમાં 129 રન બનાવ્યા હતા. વિરાટે 5 ચોગ્ગા અને 8 છગ્ગા ફટકાર્યા હતા, જ્યારે ડી વિલિયર્સે 10 ચોગ્ગા અને 12 છગ્ગા ફટકાર્યા હતા. તેની ઇનિંગ્સથી આરસીબીએ 3 વિકેટે 248 રન બનાવ્યા હતા. જવાબમાં ગુજરાતની ટીમ 104 રન બનાવીને આઉટ થઈ ગઈ હતી.
આ પહેલા પણ વિરાટ અને ડી વિલિયર્સની જોડીએ ધૂમ મચાવી હતી. હકીકતમાં, 10મે, 2015ના રોજ મુંબઈ ઈન્ડિયન્સ વિરુદ્ધ આ જ મેદાન પર વિરાટ અને ડી વિલિયર્સે બીજી વિકેટ માટે અણનમ 215 રનની ભાગીદારી કરી હતી. તે સમયે તે રનની દ્રષ્ટિએ સૌથી મોટી ભાગીદારી હતી. મુંબઈ સામે વિરાટે 50 બોલમાં 6 ચોગ્ગા અને 4 છગ્ગાની મદદથી 82 રનની અણનમ ઈનિંગ રમી હતી. આ સાથે જ ડી વિલિયર્સે 59 બોલમાં અણનમ 133 રન બનાવ્યા હતા. આ ઇનિંગ દરમિયાન ડી વિલિયર્સે 19 ચોગ્ગા અને 4 છગ્ગા ફટકાર્યા હતા. એક વિકેટે 235 રન બનાવ્યા બાદ આરસીબીએ મુંબઈની ટીમને 7 વિકેટે માત્ર 196 રન બનાવવા દીધા અને મેચ જીતી લીધી.
પંજાબના બેટ્સમેન એડમ ગિલક્રિસ્ટ અને શોન માર્શે 17 મે 2011ના રોજ ધર્મશાલા ખાતે આરસીબી સામે બીજી વિકેટ માટે 206 રનની ભાગીદારી કરી હતી. આ લીગની ત્રીજી સર્વોચ્ચ ભાગીદારી છે.