ઈજા બાદ સંજુ સેમસનની વાપસી! જુઓ રાજસ્થાન રોયલ્સનો વીડિયો

ઇન્ડિયન પ્રીમિયર લીગ 2025 માં રાજસ્થાન રોયલ્સ તેમજ ટીમના કેપ્ટન સંજુ સેમસનની સફર ખાસ નહોતી. રાજસ્થાન રોયલ્સે આ સિઝનમાં અત્યાર સુધીમાં 12 મેચ રમી છે અને પ્લેઓફમાંથી બહાર થઈ ગઈ છે. જ્યારે, સંજુ સેમસન આ 12 મેચમાંથી 5 મેચમાં પ્લેઇંગ ઇલેવનમાંથી બહાર રહ્યો. આ પાછળનું કારણ ઈજા હતી. પરંતુ હવે તે તેની ટીમના કેમ્પમાં જોડાઈ ગયો છે. જેનો વીડિયો રાજસ્થાન રોયલ્સે પોતે પોતાના સોશિયલ મીડિયા પર પોસ્ટ કર્યો છે.

રાજસ્થાન રોયલ્સના કેપ્ટન સંજુ સેમસન ઈજા બાદ ટીમમાં પાછા ફર્યા છે. રાજસ્થાન રોયલ્સે તેમના ઓફિશિયલ સોશિયલ મીડિયા હેન્ડલ પર એક વીડિયો જાહેર કર્યો છે, જેમાં સંજુ સેમસન ટીમ હોટલમાં પ્રવેશતા જોવા મળી રહ્યા છે. આ વીડિયોના કેપ્શનમાં રાજસ્થાન રોયલ્સે લખ્યું, ‘આપણી માલુમિનાટી પાછી આવી ગઈ છે.’

ઉલ્લેખનીય છે કે, અરુણ જેટલી સ્ટેડિયમમાં દિલ્હી કેપિટલ્સ સામે બેટિંગ કરતી વખતે સંજુ સેમસનને પાંસળીમાં ઈજા થઈ હતી. આ પછી તે સતત ઘણી મેચ રમી શક્યો નહીં. દરમિયાન, IPL સસ્પેન્ડ થવાને કારણે, તેને સ્વસ્થ થવા માટે વધારાનો સમય મળ્યો અને હવે તે સ્વસ્થ થઈ ગયો છે.

સંજુ સેમસન અત્યાર સુધી IPL 2025 માં માત્ર 7 મેચ રમ્યો છે. તેણે આ 7 મેચોમાં 37.33 ની સરેરાશથી 224 રન બનાવ્યા છે. જેમાં 1 અડધી સદીનો પણ સમાવેશ થાય છે.