બુધવારે ઈન્ડિયન પ્રીમિયર લીગ (IPL) 2023 એલિમિનેટર મેચમાં, મુંબઈ ઈન્ડિયન્સે લખનૌ સુપર જાયન્ટ્સ સામે 81 રને જીત નોંધાવીને તેમની અંતિમ આશા જીવંત રાખી હતી.
એમએ ચિદમ્બરમ સ્ટેડિયમ ખાતે લખનૌ સામે પ્રથમ બેટિંગ કરતા મુંબઈએ 8 વિકેટના નુકસાને 182 રન બનાવ્યા બાદ લખનૌને 16.3 ઓવરમાં 101 રનમાં ઓલઆઉટ કરી દીધું હતું. જો કે એલિમિનેટર મેચમાં લખનૌને કારમી હાર મળી હતી, પરંતુ આ ટીમે ગયા વર્ષે ડેબ્યૂ કર્યા બાદ શાનદાર પ્રદર્શન કર્યું છે.
લખનૌ સુપર જાયન્ટ્સ ગયા વર્ષે જ આઈપીએલમાં જોડાઈ હતી અને ટીમ તેની પ્રથમ આઈપીએલ એડિશનમાં એલિમિનેટર મેચમાં પહોંચી હતી, જેમાં તેને હારનો સામનો કરવો પડ્યો હતો. બીજી તરફ, લખનૌ હવે બીજી વખત એલિમિનેટરમાં પહોંચી ગઈ હતી અને આ ટીમની ક્ષમતાને જોતા એવું લાગે છે કે લખનૌ આવનારા વર્ષોમાં IPL ટાઇટલ જીતી શકે છે.
લખનૌની ટીમમાં રવિ બિશ્નોઈ, આયુષ બદોની અને નવીન-ઉલ-હક જેવા યુવા સ્ટાર્સે આ સિઝનમાં અસાધારણ પ્રદર્શન કર્યું છે. ભારતના પૂર્વ ક્રિકેટર સુનીલ ગાવસ્કરે આ ત્રણ ખેલાડીઓની સફળતા પાછળનો શ્રેય લખનૌના મેન્ટર ગૌતમ ગંભીરને આપ્યો છે.
ગાવસ્કરે કહ્યું કે લખનૌના મેન્ટર ગૌતમ ગંભીરે ટીમમાં ઘણા યુવા ખેલાડીઓને ઉછેર્યા છે, ‘ભારતીય કોચ અથવા મેન્ટર IPLમાં શું કરી શકે છે તેનું સૌથી મોટું ઉદાહરણ ગૌતમ ગંભીર છે. ગૌતમ ગંભીર સુકાની કેએલ રાહુલ વિના લખનૌને પ્લેઓફમાં લઈ ગયો છે અને તેની પાસે ટીમને ટાઈટલ જીતાડવાની ક્ષમતા છે. તેણે છેલ્લા 2 વર્ષમાં નવીન-ઉલ-હક, રવિ વિશ્નોઈ અને આયુષ બદોનીને જે રીતે ક્રિકેટર તરીકે વિકસાવ્યા છે તે પ્રશંસનીય છે. ગંભીરે આ 3 ખેલાડીઓનું ભવિષ્ય ઉજ્જવળ બનાવી દીધું છે.