સોમવારે ઈન્ડિયન પ્રીમિયર લીગ (આઈપીએલ)ના 15માં જન્મદિવસ પર મુંબઈના બ્રેબોર્ન સ્ટેડિયમમાં આવો નજારો જોવા મળ્યો, જે લીગના ઈતિહાસમાં પહેલા ક્યારેય જોવા મળ્યો ન હતો.
IPLના 15માં જન્મદિવસ પર, લીગની પ્રથમ ચેમ્પિયન રાજસ્થાન રોયલ્સ (RR) નો સામનો કોલકાતા નાઈટ રાઈડર્સ (KKR) સામે થયો હતો.
આ સ્પેશિયલ મેચમાં પહેલા રાજસ્થાનના જોસ બટલરે આ સિઝનની પોતાની બીજી સદી ફટકારી અને ત્યારબાદ લેગ સ્પિનર યુઝવેન્દ્ર ચહલે (હેટ્રિક) 3 બોલમાં 3 વિકેટ લઈને તેની હેટ્રિક પૂરી કરી. બટલરની સદી અને ચહલની હેટ્રિકના આધારે રાજસ્થાને આ મેચમાં કોલકાતાને સાત રનથી હરાવ્યું હતું. આઈપીએલના ઈતિહાસમાં આ પ્રથમ વખત બન્યું છે કે કોઈ મેચમાં સદી ફટકારવામાં આવી હોય અને હેટ્રિક પણ લેવામાં આવી હોય.
રાજસ્થાને કોલકાતા સામે જીતવા માટે 218 રનનો લક્ષ્યાંક રાખ્યો હતો અને એવું લાગી રહ્યું હતું કે મેચ રાજસ્થાનના હાથમાંથી નીકળી જશે. પરંતુ ચહલે 17મી ઓવરમાં હેટ્રિક સહિત ચાર વિકેટ લઈને મેચને સંપૂર્ણપણે ફેરવી નાખી હતી. ચહલે આ ઓવરમાં કોલકાતાના કેપ્ટન શ્રેયસ અય્યર, શિવમ માવી અને પેટ કમિન્સને આઉટ કરીને પોતાની હેટ્રિક પૂરી કરી હતી.
શ્રેયસ ઐયર એલબીડબ્લ્યુ આઉટ થયો હતો, જ્યારે માવીને રિયાન પરાગના હાથે કેચ આઉટ થયો હતો, જ્યારે પેટ કમિન્સ સંજુ સેમસનના હાથે વિકેટ પાછળ કેચ થયો હતો. ચહલ આ સિઝનમાં હેટ્રિક લેનારો પ્રથમ બોલર બની ગયો છે. તેણે મેચમાં 4 ઓવરમાં 40 રન આપીને 5 વિકેટ લીધી અને આ માટે તેને મેન ઓફ ધ મેચનો એવોર્ડ મળ્યો.
ચહલ IPLમાં હેટ્રિક લેનારો 21મો અને રાજસ્થાન રોયલ્સનો પાંચમો બોલર છે. તેના પહેલા અજિત ચંદિલા, પ્રવીણ તાંબે, શેન વોટસન અને શ્રેયસ ગોપાલ IPLમાં રાજસ્થાન ટીમ માટે હેટ્રિક લઈ ચૂક્યા છે.