ક્રિકેટ ચાહકો એશિયા કપ 2023ની આતુરતાથી રાહ જોઈ રહ્યા છે. ભારત અને પાકિસ્તાન એક વર્ષ બાદ આ ટૂર્નામેન્ટમાં સામસામે આવવાના છે. આ અઠવાડિયે આ ટુર્નામેન્ટ માટે ટીમ ઈન્ડિયાની જાહેરાત થઈ શકે છે. પરંતુ ટીમની જાહેરાત પહેલા ભારતીય ટીમના ચાહકો માટે એક ખરાબ સમાચાર સામે આવ્યા છે. હકીકતમાં ટીમ ઈન્ડિયાના બે સ્ટાર ખેલાડી એશિયા કપમાં રમી શકશે નહીં.
કેએલ રાહુલ અને શ્રેયસ અય્યરને એશિયા કપ 2023 માટે પસંદ કરવામાં આવે તેવી શક્યતા નથી, જેના માટેની ટીમ આ અઠવાડિયે જાહેર કરવામાં આવે તેવી અપેક્ષા છે. બીસીસીઆઈના સૂત્રોએ સંકેત આપ્યો છે કે આ બંને બેટ્સમેન 30 ઓગસ્ટથી 17 સપ્ટેમ્બર દરમિયાન યોજાનારી ચેમ્પિયનશિપ માટે ધ્યાનમાં લેવા માટે પૂરતા પ્રમાણમાં સ્વસ્થ થયા નથી. આ બંને ખેલાડીઓએ નેટ્સમાં તેમની બેટિંગની શરૂઆત કરી હતી અને હાલમાં તેઓ સ્ટ્રેન્થ અને ફિટનેસ ડ્રિલ કરી રહ્યા છે.
BCCIની મેડિકલ ટીમ તેમની પ્રગતિથી સંતુષ્ટ છે અને આગામી દિવસોમાં બંનેની કૌશલ્ય અને સ્ટ્રેન્થ કન્ડીશનીંગમાં વધુ વધારો કરવામાં આવશે. આશા રાખી શકાય છે કે આ બંને ખેલાડીઓ વર્લ્ડ કપ સુધી ફિટ રહી શકે છે.