પાકિસ્તાન ક્રિકેટ ટીમના કેપ્ટન બાબર આઝમ આ દિવસોમાં મેદાન પર અને મેદાનની બહાર વિવાદોમાં ફસાયેલા છે. પાકિસ્તાનની ટીમે તાજેતરમાં ઇંગ્લેન્ડ સામેની ત્રણ મેચની હોમ ટેસ્ટ શ્રેણીમાં 0-3થી ક્લીન સ્વીપનો સામનો કરવો પડ્યો હતો, ત્યારબાદ ન્યૂઝીલેન્ડ સામેની બે મેચની હોમ ટેસ્ટ શ્રેણીમાં 0-0થી ડ્રો રહી હતી.
પાકિસ્તાનને ન્યૂઝીલેન્ડ સામેની હોમ વનડે સિરીઝમાં 1-2થી હારનો સામનો કરવો પડ્યો હતો. આ બધા પછી બાબરની કેપ્ટનશીપ પર સતત સવાલો ઉઠી રહ્યા છે. આ બધાની વચ્ચે વધુ એક વિવાદ સામે આવ્યો છે. સોશિયલ મીડિયા પર બાબરના કેટલાક અંગત ફોટા અને વીડિયો શેર કરીને એક યુવતીએ તેના પર સેક્સટિંગનો આરોપ લગાવ્યો છે.
આ સમગ્ર મામલે બાબરે મૌન સેવ્યું છે, પરંતુ તેણે પોતાનો ફોટો શેર કરતા એક ટ્વિટ કર્યું છે, જે વાયરલ થઈ રહ્યો છે. ટ્વીટમાં પોતાનો ફોટો શેર કરતા બાબરે લખ્યું, ‘ખુશ રહેવા માટે વધારે કંઈ કરવાની જરૂર નથી.’
Doesn't take too much to be happy ☺️ pic.twitter.com/udKmZTHl6V
— Babar Azam (@babarazam258) January 16, 2023
આ ટ્વીટ પર કેટલાક લોકોએ બાબરના સમર્થનમાં જવાબ આપ્યો છે તો કેટલાકે તેને જોરદાર ટ્રોલ કર્યો છે. બાબર ત્રણેય ફોર્મેટમાં પાકિસ્તાન ક્રિકેટ ટીમનો કેપ્ટન છે. હાલમાં જ એવી ચર્ચા ચાલી રહી છે કે બાબર પાસેથી વનડે અને ટેસ્ટ ટીમની કેપ્ટનશીપ છીનવાઈ શકે છે. તેની કારકિર્દીની વાત કરીએ તો, બાબરે 47 ટેસ્ટ, 95 વનડે અને 99 ટી20 આંતરરાષ્ટ્રીય મેચ રમી છે. આ દરમિયાન બાબરે ત્રણેય ફોર્મેટમાં અનુક્રમે 3696, 4813 અને 3355 રન બનાવ્યા છે.