ઓસ્ટ્રેલિયાના પૂર્વ ક્રિકેટર બ્રેટ લીએ ભારતીય ઝડપી બોલર ઉમરાન મલિકની તુલના પાકિસ્તાનના પૂર્વ ઝડપી બોલર વકાર યુનિસ સાથે કરી છે. તેનું માનવું છે કે મલિકની બોલિંગ તેને પાકિસ્તાનના ભૂતપૂર્વ ફાસ્ટ બોલર વકાર યુનિસની યાદ અપાવે છે. મલિકે IPL 2022માં તેની શાનદાર બોલિંગ માટે ઘણા દિગ્ગજો પાસેથી પ્રશંસા મેળવી હતી અને દરેક તેને ભારત માટે રમતા જોવા માંગે છે.
મલિકે આઈપીએલ 2022માં સનરાઈઝર્સ હૈદરાબાદ માટે શાનદાર પ્રદર્શન કર્યું હતું અને તેના કારણે તેને દક્ષિણ આફ્રિકા સામેની આગામી ઘરેલું શ્રેણી માટે પ્રથમ વખત ભારતીય ટીમમાં સામેલ કરવામાં આવ્યો છે. મલિકે આ આઈપીએલ સિઝનમાં સતત 150 કિમી પ્રતિ કલાકની ઝડપે બોલિંગ કરી છે અને વિરોધી બેટ્સમેનો માટે તેની બોલ પર મોટા શોટ મારવા ખૂબ મુશ્કેલ સાબિત થયા છે.
હિન્દુસ્તાન ટાઈમ્સના એક ઇન્ટરવ્યુમાં હતું કે, “હું તેનો મોટો પ્રશંસક છું. મને લાગે છે કે ઉમરાન મલિક પાસે ઘણી ગતિ છે. તે એક સ્પર્ધાત્મક ખેલાડી છે, એક ટોચનો માણસ છે જેની બોલિંગ ભૂતકાળના ઘણા બોલરો જેવી જ છે. તેની બોલિંગ જોઈને મને વકાર યુનુસની યાદ આવે છે.”
જમ્મુના રહેવાસી મલિકે IPL 2022માં શાનદાર પ્રદર્શન કર્યું હતું. તેણે 14 મેચમાં 20.18ની એવરેજ અને 9.03ની ઈકોનોમીથી 22 વિકેટ લીધી હતી. તેણે ગુજરાત ટાઇટન્સ સામે તેની સર્વશ્રેષ્ઠ બોલિંગ ફિગર રેકોર્ડ કરી હતી, જેમાં મલિકે 25 રનમાં પાંચ વિકેટ લીધી હતી.
લીએ વિરાટ કોહલીના તાજેતરના ફોર્મ વિશે પણ વાત કરી. વિરાટ અત્યારે તેની કારકિર્દીના ખરાબ તબક્કામાંથી પસાર થઈ રહ્યો છે અને આ સિઝનમાં તે 16 મેચમાં માત્ર 341 રન જ બનાવી શક્યો હતો. તેણે કહ્યું, “હું વિશ્વના ઘણા લોકોની જેમ કોહલીનો મોટો પ્રશંસક છું. હું માત્ર આશા રાખું છું કે તેને ખરેખર તેની તક મળે. તેને થોડો સમય જોઈએ છે.”