ટીમ ઈન્ડિયાના ફાસ્ટ બોલર અર્શદીપ સિંહે IPL 2022માં સારો દેખાવ કર્યો હતો. આ કારણે તેને ટીમ ઈન્ડિયામાં સામેલ કરવામાં આવ્યો હતો. અર્શદીપને ટી-20 બાદ વનડે ટીમમાં સામેલ કરવામાં આવ્યો હતો. હાલમાં જ પાકિસ્તાનના પૂર્વ ખેલાડી દાનિશ કનેરિયાએ અર્શદીપના વખાણ કર્યા છે. તેણે કહ્યું છે કે તે T20 વર્લ્ડ કપ માટે ભારત માટે સારો વિકલ્પ છે. કનેરિયાએ તેનું કારણ પણ જણાવ્યું છે.
કનેરિયાનું કહેવું છે કે ટી-20 વર્લ્ડ કપની સાથે એશિયા કપ માટે પણ અર્શદીપ શ્રેષ્ઠ વિકલ્પ છે. તેણે આ ઝડપી બોલરની પ્રશંસા કરતા કહ્યું કે, મારી વાત યાદ રાખો. અર્શદીપ ત્રીજી વનડે રમશે અને અસરકારક પ્રદર્શન કરશે. અર્શદીપ પાસે કળા છે અને જ્યારે તે બોલિંગ કરે છે ત્યારે તેના મગજનો ઉપયોગ કરે છે. તે સમજદારીથી બોલિંગ કરે છે અને વિકેટ કેવી રીતે લેવી તે જાણે છે. તે T20 વર્લ્ડ કપ અને કદાચ એશિયા કપ માટે પણ ભારતીય ટીમ માટે શ્રેષ્ઠ વિકલ્પ છે. એશિયા કપ દુબઈમાં યોજાશે અને તેઓ ત્યાં સફળ થઈ શકે છે.
તેણે ટી. નટરાજનનો પણ ઉલ્લેખ કર્યો હતો. કનેરિયાએ કહ્યું, “હું પણ નટરાજનને ફરી ભારત માટે રમતા જોવા માંગુ છું. તે ફરીથી તે જ અસર કરી શકે છે જેવી તેણે ઓસ્ટ્રેલિયામાં કરી હતી. તે એક શાનદાર બોલર છે, પરંતુ અત્યારે ભારત પાસે સારું બોલિંગ આક્રમણ છે.”
નોંધનીય છે કે અર્શદીપ ડોમેસ્ટિક મેચોમાં સારો દેખાવ કરી રહ્યો છે. તેણે ફર્સ્ટ ક્લાસ મેચોની 10 ઇનિંગ્સમાં 21 વિકેટ લીધી છે. જ્યારે લિસ્ટ Aની 16 ઇનિંગ્સમાં 21 વિકેટ લીધી છે. તેણે ટી20 મેચમાં 58 વિકેટ લીધી છે. અર્શદીપે અત્યાર સુધી માત્ર એક જ T20 ઈન્ટરનેશનલ મેચ રમી છે. જેમાં તેણે 2 વિકેટ ઝડપી હતી.