ડેવિડ વોર્નર પરનો સાડા 6 વર્ષનો પ્રતિબંધ હટ્યો, આ ટીમનો કેપ્ટન બનશે

ક્રિકેટ ઓસ્ટ્રેલિયાએ ડેવિડ વોર્નર પર સુકાનીપદેથી લાગેલો આજીવન પ્રતિબંધ હટાવી લીધો છે. ક્રિકેટ ઓસ્ટ્રેલિયા આચાર આયોગની સમીક્ષા બાદ સાડા છ વર્ષથી ચાલી રહેલા આ પ્રતિબંધને હટાવવાનો નિર્ણય લેવામાં આવ્યો છે.

આનો અર્થ એ છે કે તે હવે આગામી બિગ બેશ લીગમાં સિડની થંડરની કેપ્ટનશીપ માટે લાયક છે. 2018માં કેપટાઉન ટેસ્ટમાં બોલ ટેમ્પરિંગ બાદ તેના પર પ્રતિબંધ લગાવવામાં આવ્યો હતો, ત્યારબાદ તેને ઓસ્ટ્રેલિયામાં કોઈપણ ટીમની કેપ્ટનશિપ કરવાની મંજૂરી આપવામાં આવી ન હતી.

ક્રિકેટ ઓસ્ટ્રેલિયાએ સ્વતંત્ર આચાર આયોગની સમીક્ષાના તારણો બહાર પાડ્યા હતા, જેમાં ત્રણ સભ્યોની પેનલે સર્વસંમતિથી નિર્ણય લીધો હતો કે વોર્નરે 2022માં આચારસંહિતામાં થયેલા ફેરફારો બાદ પ્રતિબંધ હટાવવા માટે જરૂરી માપદંડોને પૂર્ણ કર્યા છે. પેનલે આ નિર્ણય ડેવિડ વોર્નરની ભૂલની કબૂલાત અને ત્યારપછી તેના વર્તનમાં થયેલા ફેરફારને ધ્યાનમાં રાખીને લીધો છે.

વોર્નર હવે સિડની થંડરનો કેપ્ટન બનવાની રેસમાં છે, કારણ કે તે આગામી BBLમાં આખી સિઝન માટે ઉપલબ્ધ રહેશે.

તમને જણાવી દઈએ કે વોર્નરની સાથે સ્ટીવ સ્મિથ પણ બોલ ટેમ્પરિંગ કેસમાં દોષિત હતો અને તેના પર એક વર્ષ માટે રમવા પર પ્રતિબંધ લગાવવામાં આવ્યો હતો. પરંતુ પ્રતિબંધ હટાવ્યા બાદ તેણે ઓસ્ટ્રેલિયાની ટેસ્ટ અને ODI ટીમની કેપ્ટનશિપ પણ કરી હતી અને હાલમાં તે ઓસ્ટ્રેલિયાની ટેસ્ટ ટીમના વાઇસ-કેપ્ટન છે.

ઓસ્ટ્રેલિયા ઉપરાંત વોર્નરે વિશ્વની ઘણી ફ્રેન્ચાઈઝી લીગમાં અલગ-અલગ ટીમોની કેપ્ટનશીપ કરી છે. આઈપીએલમાં સનરાઈઝર્સ હૈદરાબાદ અને દિલ્હી કેપિટલ્સની કમાન સંભાળી.