ભારતની 1983ની વર્લ્ડ કપ વિજેતા ટીમના હીરો રોજર બિન્ની, ભારતીય ક્રિકેટ કંટ્રોલ બોર્ડ (BCCI) ના પ્રમુખ તરીકે સૌરવ ગાંગુલીની જગ્યા લેશે. ગાંગુલી છેલ્લા ત્રણ વર્ષથી બીસીસીઆઈના અધ્યક્ષ છે અને તે 18 ઓક્ટોબરે યોજાનારી બોર્ડની વાર્ષિક સામાન્ય સભા (AGM)માં બિન્ની માટે પદ છોડશે.
એક અઠવાડિયાના હોબાળા પછી, એવું નક્કી કરવામાં આવ્યું હતું કે બેંગલુરુ સ્થિત 67 વર્ષીય બિન્ની બોર્ડના 36મા અધ્યક્ષ હશે. કેન્દ્રીય ગૃહ પ્રધાન અમિત શાહના પુત્ર જય શાહ સતત બીજી ટર્મ માટે BCCI સેક્રેટરી તરીકે ચાલુ રહેશે. આ સિવાય શાહ આઈસીસી બોર્ડમાં ગાંગુલીનું સ્થાન પણ લેશે.
બીસીસીઆઈના પદાધિકારીઓમાં એકમાત્ર કોંગ્રેસી રાજીવ શુક્લા બોર્ડના ઉપાધ્યક્ષ તરીકે ચાલુ રહેશે. ખેલ મંત્રી અનુરાગ ઠાકુરના નાના ભાઈ અરુણ સિંહ ધૂમલ હવે ઈન્ડિયન પ્રીમિયર લીગ (આઈપીએલ)ના અધ્યક્ષ બનશે. તેઓ બ્રિજેશ પટેલનું સ્થાન લેશે.
મહારાષ્ટ્ર ભાજપના નેતા આશિષ શેલાર બોર્ડના નવા ખજાનચી હશે જેનો અર્થ છે કે તેઓ મુંબઈ ક્રિકેટ એસોસિએશન (MCA)ના પ્રમુખ બની શકશે નહીં. તેઓ શરદ પવાર જૂથના સમર્થનથી આ ભૂમિકા ભજવવાના હતા.
બીસીસીઆઈના સૂત્રોએ પીટીઆઈને જણાવ્યું હતું કે, “કેન્દ્ર સરકારના એક પ્રભાવશાળી મંત્રીએ બોર્ડના પદાધિકારીઓની પસંદગીમાં મહત્વની ભૂમિકા ભજવી હતી.” બિન્ની 18 ઓક્ટોબરે મુંબઈમાં યોજાનારી BCCI એજીએમમાં સત્તાવાર રીતે ચાર્જ સંભાળશે. તમામ ઉમેદવારો સર્વસંમતિથી ચૂંટાયા હોવાથી કોઈપણ પદ માટે ચૂંટણી થશે નહીં.
મિડિયમ પેસ બોલર બિન્નીએ 1983ના વર્લ્ડ કપમાં ભારતને ચેમ્પિયન બનાવવામાં મહત્વની ભૂમિકા ભજવી હતી. ત્યારબાદ તેણે આઠ મેચોમાં 18 વિકેટ લીધી જે તે ટુર્નામેન્ટ માટે એક રેકોર્ડ હતો.
Former India cricketer Roger Binny to replace Sourav Ganguly as BCCI president, Jay Shah to remain secretary
: BCCI sources— Press Trust of India (@PTI_News) October 11, 2022
પ્રમુખપદ માટે બિન્નીની પસંદગી જોકે આશ્ચર્યજનક હતી. બીસીસીઆઈના એક સૂત્રએ કહ્યું, “રોજર એક સારો વ્યક્તિ છે જેણે ભારત માટે રમતી વખતે દેશનું નામ રોશન કર્યું હતું. તે વર્લ્ડ કપનો હીરો છે અને તેની સ્વચ્છ છબી છે.”