સુપ્રીમ કોર્ટે હવે ભારતીય ક્રિકેટ કંટ્રોલ બોર્ડ (BCCI) ના બંધારણમાં સંશોધન સંબંધિત અરજી પર સુનાવણી આગામી સપ્તાહ સુધી સ્થગિત કરી દીધી છે. આ કેસની આગામી સુનાવણી હવે 28 જુલાઈના રોજ થશે.
આ સાથે સુપ્રીમ કોર્ટે વરિષ્ઠ વકીલ મનિન્દર સિંહને નવા એમિકસ ક્યૂરી તરીકે નિયુક્ત કર્યા છે. ભારતના મુખ્ય ન્યાયાધીશ એનવી રમનાની આગેવાની હેઠળની બેન્ચે જણાવ્યું હતું કે ભૂતપૂર્વ પીએસ નરસિમ્હા હવે ઉપલબ્ધ નથી કારણ કે તેઓ સુપ્રીમ કોર્ટમાં જજ તરીકે સેવા આપી રહ્યા છે.
કોર્ટે કહ્યું, અમારે એમિકસ ક્યુરી (ન્યાયના મિત્ર)ને પણ સાંભળવું પડશે, હવે તે ઉપલબ્ધ નથી. હું નવી એપોઇન્ટમેન્ટ લેવાનો છું. વરિષ્ઠ વકીલ મનિન્દર સિંઘ નવા એમિકસ ક્યૂરી હશે.
બીસીસીઆઈએ પ્રેસિડેન્ટ, સેક્રેટરી અને અન્ય પદાધિકારીઓ માટે ‘કૂલિંગ ઓફ’ પીરિયડ સંબંધિત નિયમોમાં ફેરફાર કરવાની પરવાનગી માંગતી અરજી દાખલ કરી હતી. અરજીમાં બીસીસીઆઈ પ્રમુખ સૌરવ ગાંગુલી અને સચિવ જય શાહના કાર્યકાળને લંબાવવાના નિર્દેશોની પણ માંગ કરવામાં આવી હતી. આ અરજી 2020માં દાખલ કરવામાં આવી હતી.
બીસીસીઆઈએ તેના પ્રસ્તાવિત સુધારામાં તેના પદાધિકારીઓ માટે વિરામનો સમય દૂર કરવાની મંજૂરી માંગી છે જેથી બીસીસીઆઈ પ્રમુખ ગાંગુલી અને સચિવ શાહ સંબંધિત રાજ્ય ક્રિકેટ એસોસિએશનમાં છ વર્ષ પૂર્ણ કર્યા પછી પણ તેમના પદ પર ચાલુ રાખી શકે.
સુપ્રીમ કોર્ટ દ્વારા મંજૂર કરાયેલા BCCIના બંધારણ મુજબ, જો કોઈ પદાધિકારી રાજ્ય ક્રિકેટ એસોસિએશન અથવા BCCIમાં સતત ત્રણ વર્ષની બે ટર્મ પૂર્ણ કરે છે, તો તેણે ત્રણ વર્ષનો ફરજિયાત બ્રેક લેવો પડશે. ગાંગુલી ક્રિકેટ એસોસિએશન ઓફ બંગાળ (CAB)માં પદાધિકારી હતા જ્યારે શાહ ગુજરાત ક્રિકેટ એસોસિએશનમાં હતા.