ઓસ્ટ્રેલિયાના ODI અને T20 કેપ્ટન એરોન ફિન્ચને આશા છે કે તે જલ્દી જ તેના ફોર્મમાં પરત ફરશે. તમને જણાવી દઈએ કે, તાજેતરમાં સમાપ્ત થયેલ IPL 2022 એડિશનમાં ફિન્ચનું પ્રદર્શન ખૂબ જ નિરાશાજનક હતું. કોલકાતા નાઈટ રાઈડર્સ (KKR) તરફથી રમતા તેણે 5 મેચમાં માત્ર 86 રન બનાવ્યા હતા.
30 મેના રોજ પત્રકારો સાથે વાત કરતા તેણે કહ્યું હતું કે તે આગામી T20 વર્લ્ડ કપ 2022 માટે તેની નબળાઈ પર સખત મહેનત કરી રહ્યો છે. તેણે કહ્યું કે, હું મારી કારકિર્દીમાં ઘણી વખત આ સમયમાંથી પસાર થયો છું. દરેક વ્યક્તિ સાથે એવું બને છે કે તમે વધુ ને વધુ રન બનાવવાને કારણે તમારી વિકેટ જલ્દી ગુમાવો છો.
તેણે કહ્યું કે તે તેના ફોર્મમાં પાછા આવવા માટે તેની બેટિંગમાં ટેકનિક પર કામ કરી રહ્યો છે. બોલર હંમેશા પોતાની બોલિંગ બદલતો રહે છે. તે તમને સતત બોલ અંદર અને બહાર ફેંકતો રહે છે. મને આવતા બોલથી થોડી અસ્વસ્થતા થાય છે તેથી મેં વિચાર્યું છે કે પછી તે વનડે હોય કે ટી-20, હું પહેલા 5-6 બોલ જોઈશ અને પછી મારા શોટ્સ રમીશ.
ઓસ્ટ્રેલિયાએ આવતા મહિને શ્રીલંકા સામે મર્યાદિત ઓવરના ફોર્મેટમાં 8 મેચ રમવાની છે, ત્યારબાદ ઝિમ્બાબ્વે, ન્યુઝીલેન્ડ, વેસ્ટ ઈન્ડિઝ અને પછી ઈંગ્લેન્ડ સામે ઘરઆંગણે શ્રેણી રમવાની છે. આ તમામ શ્રેણી બાદ ઓસ્ટ્રેલિયાની ટીમ ટી20 વર્લ્ડ કપ 2022 રમશે, જે ઓક્ટોબર-નવેમ્બર મહિનામાં રમાશે.
ફિન્ચે વધુમાં કહ્યું કે, ઓસ્ટ્રેલિયન ક્રિકેટ માટે આવનાર સમય ઘણો વ્યસ્ત રહેવાનો છે. મારે પણ આ મેચોમાં મારું ફોર્મ પાછું લાવવું પડશે, ખાસ કરીને વન-ડે ક્રિકેટમાં. અમે બધા આ શ્રેણી માટે સંપૂર્ણ રીતે તૈયાર છીએ. આશા છે કે અમારી ટીમ આ તમામ શ્રેણીમાં તેમજ T20 વર્લ્ડ કપમાં પણ સારું પ્રદર્શન કરશે. તમને જણાવી દઈએ કે, ઓસ્ટ્રેલિયા ટી20 વર્લ્ડ કપ 2021ની વિજેતા પણ રહી છે અને આ વર્ષે પણ તે પોતાના શ્રેષ્ઠ પ્રદર્શનથી આ ટૂર્નામેન્ટ જીતવા માંગે છે.