ઈરફાન પઠાણ: મેજર ધ્યાનચંદ ખેલ રત્ન બાદ આશા છે હવે સ્ટેડિયમનું નામ બદલાય

પૂર્વ ભારતીય ક્રિકેટર ઇરફાન પઠાણે પણ સરકારના આ પગલાનું સ્વાગત કર્યું છે….

દેશના સર્વોચ્ચ રમત પુરસ્કાર રાજીવ ગાંધી ખેલ રત્ન પુરસ્કારનું હવે નામ બદલવામાં આવ્યું છે. હવે દેશનો આ પ્રતિષ્ઠિત પુરસ્કાર ભારતના મહાન ખેલાડી મેજર ધ્યાનચંદ તરીકે ઓળખાશે. વડાપ્રધાન નરેન્દ્ર મોદીએ શુક્રવારે ટ્વિટર પર આની જાહેરાત કરી હતી. પીએમ મોદીએ કહ્યું કે દેશવાસીઓને એવી લાગણી હતી કે આ પુરસ્કાર ભારતીય રમતના મહાન ખેલાડી મેજર ધ્યાનચંદના નામે રાખવો જોઈએ અને તેથી હવે આ પુરસ્કાર હવે મેજર ધ્યાનચંદ ખેલ રત્ન પુરસ્કારના નામે જાણીતો થશે. કેન્દ્ર સરકારના આ નિર્ણયની ખૂબ પ્રશંસા થઈ રહી છે.

દરમિયાન, પૂર્વ ભારતીય ક્રિકેટર ઇરફાન પઠાણે પણ સરકારના આ પગલાનું સ્વાગત કર્યું છે. આ સાથે જ તેણે આશા વ્યક્ત કરી છે કે હવે સ્ટેડિયમોનું નામ પણ રમત જગતની હસ્તીઓના નામ પર રાખવામાં આવશે. પઠાણે ટ્વિટ કરતી વખતે આ વાત કહી હતી. 36 વર્ષીય ઈરફાન પઠાણે બે ટ્વીટમાં આ વાત કહી હતી.

તેણે પોતાના ટ્વિટમાં લખ્યું, ‘આ પગલું એકદમ આવકાર્ય છે. ખેલાડીઓને માન્યતા મળી રહી છે અને તેમના નામે એવોર્ડ રાખવામાં આવી રહ્યો છે. આશા છે કે રમતમાં આવી ઘણી વસ્તુઓ શરૂ થશે.

આ પછી, તેણે અન્ય એક ટ્વિટમાં લખ્યું, ‘આશા છે કે ભવિષ્યમાં રમતગમતના સ્ટેડિયમ પણ ખેલાડીઓના નામે હશે.’

જોકે, આ વર્ષની શરૂઆતમાં અમદાવાદના મોટેરા સ્ટેડિયમનું નામ બદલીને નરેન્દ્ર મોદી સ્ટેડિયમ કરવામાં આવ્યું હતું. પીએમ મોદીના નામ પર સ્ટેડિયમનું નામ પડ્યા બાદ ઘણા લોકોએ તેના પર નારાજગી વ્યક્ત કરી હતી, જ્યારે ઘણા લોકોએ ત્યારે પણ તેને ટેકો આપ્યો હતો.