શું આ કારણે બાબર આઝમે સુકાની પદ છોડ્યું? જાણો શું કીધું

પાકિસ્તાન ક્રિકેટમાં છેલ્લા કેટલાક સમયથી સતત ઉથલપાથલ ચાલી રહી છે. તાજેતરમાં એવા અહેવાલો આવ્યા હતા કે PCB બાબર આઝમને સુકાનીપદેથી હટાવી શકે છે અને મોહમ્મદ રિઝવાનને જવાબદારી સોંપી શકે છે, પરંતુ તે પછી કહેવામાં આવ્યું હતું કે આ ખેલાડીને ચેમ્પિયન્સ ટ્રોફી સુધી આ પદ પર જાળવી રાખવામાં આવશે.

આ દરમિયાન બાબરે પોતે તાત્કાલિક અસરથી સુકાની પદ છોડવાની જાહેરાત કરી છે. બાબરે ગયા વર્ષે જ ત્રણેય ફોર્મેટની કેપ્ટનશીપ છોડી દીધી હતી પરંતુ આ વર્ષે તેને સફેદ બોલમાં કેપ્ટન બનાવવામાં આવ્યો હતો. જોકે, બાબર ફરીથી કેપ્ટન તરીકે કંઈ ખાસ બતાવી શક્યો નહોતો.

બાબર આઝમે સોશિયલ મીડિયા પ્લેટફોર્મ X પર પાકિસ્તાનની સફેદ બોલની કેપ્ટનશીપમાંથી રાજીનામું આપવાની જાહેરાત કરી હતી. તેણે પોતાના ટ્વીટમાં લખ્યું કે પ્રિય ચાહકો, આજે હું તમારી સાથે એક સમાચાર શેર કરી રહ્યો છું. ગયા મહિને પીસીબી અને ટીમ મેનેજમેન્ટ સાથેના મારા સંદેશાવ્યવહાર મુજબ મેં પાકિસ્તાન મેન્સ ક્રિકેટ ટીમના કેપ્ટન તરીકે રાજીનામું આપવાનો નિર્ણય કર્યો છે. આ ટીમનું નેતૃત્વ કરવું સન્માનની વાત છે, પરંતુ હવે સમય આવી ગયો છે કે હું પદ છોડીને મારી ભૂમિકા પર ધ્યાન કેન્દ્રિત કરું.

બાબરે વધુમાં જણાવ્યું હતું કે, “કેપ્ટન્સી એક શાનદાર અનુભવ રહ્યો છે પરંતુ તેનાથી વર્કલોડમાં પણ વધારો થયો છે. હું મારા પ્રદર્શનને પ્રાથમિકતા આપવા માંગુ છું, મારી બેટિંગનો આનંદ માણવા માંગુ છું અને મારા પરિવાર સાથે ક્વોલિટી ટાઈમ વિતાવવા માંગુ છું, જે મને ખુશ કરે છે. છોડવાથી મને આગળ વધવામાં અને મારી રમત પર ધ્યાન કેન્દ્રિત કરવામાં મદદ મળશે.”