આ બંને શ્રેણીમાં હાર્દિક પંડ્યાએ બેટ્સમેન તરીકે દરેકનું ધ્યાન ખેંચ્યું છે…
ટીમ ઈન્ડિયા આ દિવસોમાં ઓસ્ટ્રેલિયા પ્રવાસ પર છે. પહેલા ભારતીય ટીમે ઓસ્ટ્રેલિયામાં વનડે સિરીઝ અને ત્યારબાદ ટી -20 શ્રેણી અને હવે બોર્ડર-ગાવસ્કર ટેસ્ટ શ્રેણી બંને ટીમો વચ્ચે 17 ડિસેમ્બરથી શરૂ થશે. વનડે સિરીઝ 1-2 થી હારી ગયા બાદ ટી -20 આંતરરાષ્ટ્રીય શ્રેણીમાં ટીમ ઇન્ડિયાએ જોરદાર વાપસી કરી ઓસ્ટ્રેલિયાને 2-1થી પરાજિત કર્યું હતું.
આ બંને શ્રેણીમાં હાર્દિક પંડ્યાએ બેટ્સમેન તરીકે દરેકનું ધ્યાન ખેંચ્યું છે. જે બાદ ઘણા પૂર્વ ક્રિકેટરો પણ પંડ્યાની પ્રશંસા કરી રહ્યા છે. ટીમ ઈન્ડિયાના મુખ્ય કોચ રવિ શાસ્ત્રીએ પંડ્યાની પ્રશંસા કરી હતી અને તેને એક મહાન પરફોર્મર ગણાવ્યો હતો. મુખ્ય કોચ રવિ શાસ્ત્રીએ કહ્યું કે, ‘રોહિત અને બુમરાહની ગેરહાજરીમાં ટી -20 શ્રેણી જીતવી તે મોટી સિદ્ધિ છે. સૌથી સારી વાત એ છે કે તમામ ખેલાડીઓ તેમની જવાબદારી સારી રીતે સમજે છે. હાર્દિક એક શક્તિશાળી હિટર છે અને બીજી મેચમાં તેણે તેની રમત દ્વારા તે બતાવ્યું છે.’
જણાવી દઈએ કે ઓસ્ટ્રેલિયા સામેની વનડે સિરીઝમાં હાર્દિક પંડ્યાએ ભારત તરફથી સૌથી વધુ 210 રન બનાવ્યા હતા. જ્યારે ટી 20 સીરીઝની ત્રણ ઇનિંગ્સમાં તેણે 39 ની સરેરાશથી 78 રન બનાવ્યા હતા. આ સમય દરમિયાન, તેનો સ્ટ્રાઇક રેટ 156 હતો.