બાંગ્લાદેશ ક્રિકેટ બોર્ડે દક્ષિણ આફ્રિકાના ભૂતપૂર્વ ઓલરાઉન્ડર એલ્બી મર્કેલને પાવર હિટિંગ બેટિંગ કોચ તરીકે નિયુક્ત કર્યો છે. તેને દક્ષિણ આફ્રિકા સામેની વનડે શ્રેણી પહેલા આ જવાબદારી સોંપવામાં આવી છે.
મોર્કેલ બાંગ્લાદેશ ક્રિકેટ બોર્ડ દ્વારા નિયુક્ત કરાયેલા બીજા આફ્રિકન ખેલાડી છે. બે અઠવાડિયા પહેલા બોર્ડ દ્વારા ભૂતપૂર્વ ફાસ્ટ બોલર એલન ડોનાલ્ડને ફાસ્ટ બોલર કોચ તરીકે જોડવામાં આવ્યો હતો.
મંગળવારે આ વાતની પુષ્ટિ કરતા BCB ક્રિકેટ ઓપરેશન્સના પ્રમુખ જલાલ યુનુસે કહ્યું કે ઓલરાઉન્ડરે ટીમ સાથે કામ કરવાનું શરૂ કરી દીધું છે. “તે ખૂબ જ અનુભવી ખેલાડી છે જેનું આગમન અમારા બેટ્સમેનોને મદદ કરશે.”
એલ્બી મોર્કેલની કારકિર્દીની વાત કરીએ તો તેણે દક્ષિણ આફ્રિકા માટે 58 વનડે, 50 ટી20 અને માત્ર 1 ટેસ્ટ મેચ રમી છે. તેણે વનડેમાં 782 રન, ટી20માં 572 રન અને ટેસ્ટમાં 58 રન બનાવ્યા છે. બોલિંગની વાત કરીએ તો તેની પાસે ટેસ્ટમાં 1, વનડેમાં 50 અને T20માં 26 વિકેટ છે. તેણે 2004માં ન્યૂઝીલેન્ડ સામે છેલ્લી વનડે, 2009માં ઓસ્ટ્રેલિયા સામે છેલ્લી ટેસ્ટ અને 2015માં ભારત સામે છેલ્લી T20 આંતરરાષ્ટ્રીય મેચ રમી હતી.
બાંગ્લાદેશના કોચિંગ સેટઅપમાં તાજેતરના સમયમાં મોટા ફેરફારો થઈ રહ્યા છે, જેમાં જેમી સિડન્સ પણ પ્રથમ બેટિંગ કોચ તરીકે જોડાયા છે. આ પહેલીવાર છે જ્યારે બાંગ્લાદેશ પાવર-હિટિંગ બેટિંગ કોચની નિમણૂક કરી રહ્યું છે. બાંગ્લાદેશ પાવર-હિટિંગ સાથે સંઘર્ષ કરી રહ્યું છે અને આ પાસું મર્યાદિત ઓવરના ક્રિકેટમાં તેમની સૌથી નબળી કડી માનવામાં આવે છે.
બાંગ્લાદેશની ટીમ દક્ષિણ આફ્રિકાના પ્રવાસ પર 3 વનડે અને બે ટેસ્ટ મેચોની શ્રેણી રમશે. પ્રથમ ODI 18 માર્ચે, બીજી 20 માર્ચે જ્યારે ત્રીજી ODI 23 માર્ચે છે. આ સિવાય પ્રથમ ટેસ્ટ મેચ 31 માર્ચથી રમાશે જ્યારે બીજી ટેસ્ટ 8 એપ્રિલથી રમાશે.