ડીજીપી: ઋષભ પંતને મદદ કરનારા લોકોને સન્માનિત કરવામાં આવશે

ઉત્તરાખંડના ડીજીપી અશોક કુમારે એક મોટી જાહેરાત કરતા કહ્યું છે કે ભારતીય ક્રિકેટર ઋષભ પંતની કાર અકસ્માત બાદ મદદ માટે આગળ આવેલા લોકોને કેન્દ્ર સરકારની ગુડ સમરિટન સ્કીમ હેઠળ રોડ ટ્રાન્સપોર્ટ અને હાઈવે મંત્રાલય દ્વારા સન્માનિત કરવામાં આવશે.

ઋષભ પંત શુક્રવારે વહેલી સવારે રૂરકી જતા સમયે અકસ્માતનો ભોગ બન્યો હતો. અકસ્માત બાદ હરિયાણા રોડવેઝ બસના ડ્રાઈવર અને કંડક્ટરે પંતની મદદ કરી, જેના કારણે તેનો જીવ બચી ગયો. અકસ્માત બાદ તેની કાર બળીને રાખ થઈ ગઈ હતી.

પ્રશંસકોની સાથે સાથે ભારતના ભૂતપૂર્વ ક્રિકેટરો પણ પંતની મદદ કરવા બદલ સુશીલની પ્રશંસા કરી રહ્યા છે. ભારતના દિગ્ગજ VVS લક્ષ્મણે પણ તેની પ્રશંસા કરી અને તેને અસલી હીરો ગણાવ્યો.

VVS લક્ષ્મણે ટ્વીટ કર્યું, “સુશીલ કુમારનો આભાર, હરિયાણા રોડવેઝના ડ્રાઈવર જેઓ રિષભ પંતને સળગતી કારમાંથી દૂર લઈ ગયા, તેમને બેડશીટ આપી અને એમ્બ્યુલન્સ બોલાવી.” સુશીલ જી, તમારી નિઃસ્વાર્થ સેવા માટે અમે તમારા ઋણી છીએ.

રિષભ પંતને હાલમાં ICUમાં રાખવામાં આવ્યો છે. દેહરાદૂનની મેક્સ હોસ્પિટલના મેડિકલ સુપરિન્ટેન્ડેન્ટ ડૉ. આશિષ યાજ્ઞિકે જણાવ્યું હતું કે ઓર્થોપેડિક અને પ્લાસ્ટિક સર્જનોની એક ટીમ પંતની સારવાર કરી રહી છે.

ESPNcricinfoના રિપોર્ટ અનુસાર, પંતનો MRI રિપોર્ટ દર્શાવે છે કે ‘મગજ અને કરોડરજ્જુ’ સામાન્ય છે. એટલે કે, તેના પર કોઈ આંતરિક ઇજાઓ નથી. રિષભ પંતે ચહેરાની ઇજાઓ, કટ અને સ્ક્રેપ્સ માટે પ્લાસ્ટિક સર્જરી પણ કરાવી છે. પીડા અને સોજાને કારણે આવતીકાલે તેમના પગની ઘૂંટી અને ઘૂંટણનું એમઆરઆઈ સ્કેન કરવામાં આવશે.