ઝકા અશરફ PCBના નવા અધ્યક્ષ બન્યા, નિર્ણય માટે PMની મંજૂરી લેવી પડશે

પૂર્વ અધ્યક્ષ ઝકા અશરફને પાકિસ્તાન ક્રિકેટ બોર્ડ એટલે કે PCBના નવા અધ્યક્ષ તરીકે ચૂંટવાની ચર્ચા હતી, પરંતુ હવે PCBએ તેમના નામ પર મહોર મારી દીધી છે.

ક્રિકેટ પાકિસ્તાનના રિપોર્ટ પર વિશ્વાસ કરવામાં આવે તો પીસીબીએ તેમને નવા અધ્યક્ષ તરીકે પસંદ કર્યા છે. તેઓ 6 જુલાઈના રોજ લાહોરમાં પોતાની પ્રથમ બેઠક કરશે, જેમાં પાકિસ્તાન ક્રિકેટ સાથે જોડાયેલા મહત્વના મુદ્દાઓ પર ચર્ચા કરવામાં આવશે. ઝકા અશરફને ચાર મહિના માટે PCBનું અધ્યક્ષપદ સોંપવામાં આવ્યું છે અને તેઓ 10 સભ્યોની PCB મેનેજમેન્ટ કમિટિનું નેતૃત્વ કરશે.

જો ક્રિકેટ પાકિસ્તાનના અહેવાલો પર વિશ્વાસ કરવામાં આવે તો, પીપલ્સ પાર્ટી દ્વારા સમર્થિત ઝકા અશરફને પીસીબી સંબંધિત કોઈપણ મુદ્દા પર નિર્ણય લેતા પહેલા વડા પ્રધાન શહેબાઝ શરીફની મંજૂરી લેવી પડશે.

પીસીબી મેનેજમેન્ટ કમિટીના 10 સભ્યોની વાત કરીએ તો, કલિમ ઉલ્લાહ ખાન, અશફાક અખ્તર, મુસ્દ્દિક ઈસ્લામ, અઝમત પરવેઝ, ઝહીર અબ્બાસ, ખુર્રમ સુમરો, ખ્વાજા નદીમ, મુસ્તફા રામદે અને ઝુલ્ફીકાર મલિકને તેમાં સામેલ કરવામાં આવ્યા છે.

સમિતિની રચના ઉપરાંત મુખ્ય ચૂંટણી કમિશનરના પદમાં પણ ફેરફાર કરવામાં આવ્યો છે. અહેમદ શહજાદ ફારૂક રાણાના સ્થાને આ પદ પર મહમૂદ ઈકબાલની નિમણૂક કરવામાં આવી છે.