લાહોરના ગદ્દાફી સ્ટેડિયમમાં યજમાન પાકિસ્તાન અને ઓસ્ટ્રેલિયા વચ્ચે ત્રણ મેચની ODI શ્રેણીની પ્રથમ મેચ રમાઈ હતી. મુલાકાતી ટીમ ઓસ્ટ્રેલિયાએ આ મેચમાં જોરદાર જીત નોંધાવી હતી.
કાંગારૂ ટીમે પ્રથમ વનડેમાં પાકિસ્તાનને 88 રને હરાવ્યું અને શ્રેણીમાં 1-0ની લીડ મેળવી લીધી. આ મેચમાં ઓસ્ટ્રેલિયન ટીમ માટે ટ્રેવિસ હેડે સદી ફટકારી હતી, જ્યારે એડમ ઝમ્પાએ બોલિંગમાં અજાયબી કરી હતી. આ સાથે જ પાકિસ્તાની ઓપનર ઈમામ ઉલ હકની સદી વ્યર્થ ગઈ. ટ્રેવિસ હેડને સદી ફટકારવા અને બે વિકેટ લેવા બદલ પ્લેયર ઓફ ધ મેચ જાહેર કરવામાં આવ્યો હતો.
આ મેચમાં પાકિસ્તાની ટીમના કેપ્ટન બાબર આઝમે ટોસ જીતીને પહેલા બોલિંગ કરવાનો નિર્ણય કર્યો હતો. ઓસ્ટ્રેલિયાની ટીમ જ્યારે સ્કોર બોર્ડ પર 300થી વધુ રન બનાવી ચૂકી હતી ત્યારે કેપ્ટન આઝમનો નિર્ણય ખરાબ સાબિત થયો હતો. ઓસ્ટ્રેલિયાની ટીમે નિર્ધારિત 50 ઓવરમાં 7 વિકેટ ગુમાવીને 313 રન બનાવ્યા હતા. કાંગારૂ ટીમ માટે ટ્રેવિસ હેડે 72 બોલમાં 101 રન બનાવ્યા હતા જ્યારે બેન મેકડર્મોટે 55 રન બનાવ્યા હતા. કેમેરોન ગ્રીને 40 રન અને માર્કસ સ્ટોઈનિસ, માર્નસ લાબુશેન અને એરોન ફિન્ચે અનુક્રમે 26, 25 અને 23 રન બનાવ્યા હતા.
બીજી તરફ 314 રનના લક્ષ્યાંકનો પીછો કરવા ઉતરેલી પાકિસ્તાનની ટીમની શરૂઆત સારી રહી હતી. ઓપનર ઈમામ ઉલ હકે પણ 96 બોલમાં 103 રન બનાવ્યા હતા. કેપ્ટન બાબર આઝમ 57 રન બનાવીને આઉટ થયો હતો પરંતુ તેણે 72 બોલનો સામનો કર્યો હતો. આ સિવાય પાકિસ્તાની ટીમનો કોઈ બેટ્સમેન શાનદાર પ્રદર્શન કરી શક્યો નહોતો. પાકિસ્તાનની ટીમ 45.2 ઓવરમાં 225 રનમાં ઓલઆઉટ થઈ ગઈ અને 88 રનથી મેચ હારી ગઈ. ઓસ્ટ્રેલિયા તરફથી એડમ ઝમ્પાએ 4 જ્યારે મિચેલ સ્વેપ્સન અને ટ્રેવિસ હેડે 2-2 વિકેટ ઝડપી હતી.