‘તે નક્કી કરશે’, ચેમ્પિયન્સ ટ્રોફીને લઈને રાજીવ શુક્લાએ આપ્યો મોટો ઈશારો

પાકિસ્તાનને ચેમ્પિયન્સ ટ્રોફી 2025ની યજમાની મળી છે, જેના માટે PCB તૈયારીઓમાં વ્યસ્ત છે. પરંતુ ટીમ ઈન્ડિયા ટૂર્નામેન્ટમાં ભાગ લેવા માટે પાકિસ્તાનનો પ્રવાસ કરશે કે નહીં તે અંગે હજુ ચિત્ર સ્પષ્ટ થયું નથી.

આ દરમિયાન એક મહત્વપૂર્ણ અપડેટ સામે આવ્યું છે, જેમાં BCCIના ઉપાધ્યક્ષ રાજીવ શુક્લાએ સ્પષ્ટ કર્યું છે કે ICC અધ્યક્ષ જય શાહ નક્કી કરશે કે ભારતીય ટીમ ટૂર્નામેન્ટમાં ભાગ લેશે કે નહીં.

ઉલ્લેખનીય છે કે ભારત અને પાકિસ્તાન વચ્ચે લાંબા સમયથી સંબંધો સારા નથી અને ભારતીય ટીમે 2008થી પાકિસ્તાનનો પ્રવાસ કર્યો નથી. તાજેતરમાં, એક મીડિયા વાર્તાલાપ દરમિયાન, રાજીવ શુક્લાએ ભારતીય ટીમના પાકિસ્તાન પ્રવાસની સંભાવનાઓ પર ખુલાસો કર્યો અને કહ્યું કે જય શાહ એક સ્વતંત્ર ICC પ્રમુખ તરીકે કામ કરશે અને જ્યારે જરૂર પડશે ત્યારે આ બાબતે નિર્ણય લેશે.

બીસીસીઆઈના ઉપાધ્યક્ષે કહ્યું, જ્યાં સુધી ચેમ્પિયન્સ ટ્રોફીની વાત છે, પાકિસ્તાન તે ટુર્નામેન્ટનું આયોજન કરી રહ્યું છે. ગયા વર્ષે પણ એશિયા કપ પાકિસ્તાનમાં યોજાયો હતો અને અમે હાઇબ્રિડ મોડલ અપનાવ્યું હતું, જેમાં ભારતની મેચો શ્રીલંકામાં રમાઈ હતી. અત્યાર સુધી તે ટૂર્નામેન્ટ માટે BCCIમાં કોઈ ચર્ચા થઈ નથી કે અમે કોઈ નિર્ણય લઈ શક્યા નથી.

પાકિસ્તાન ક્રિકેટ બોર્ડે પહેલાથી જ ચેમ્પિયન્સ ટ્રોફીના કાર્યક્રમનો ડ્રાફ્ટ ICCને મોકલી દીધો છે. પીસીબી ભારતીય ટીમની મેચો લાહોરમાં આયોજિત કરવા માંગે છે, જેથી ખેલાડીઓને વધુ મુસાફરી ન કરવી પડે અને તેમની સુરક્ષામાં કોઈ ખામી ન રહે. હવે જોવાનું એ રહે છે કે ICC ક્યારે ચેમ્પિયન્સ ટ્રોફીનું શેડ્યૂલ જાહેર કરશે.