ભારત અને સાઉથ આફ્રિકા વચ્ચે આજથી ત્રણ મેચની વનડે સિરીઝ શરૂ થઈ રહી છે. યજમાન ટીમે સીરીઝની શરૂઆત પહેલા જ મોટો નિર્ણય લીધો છે. ક્રિકેટ સાઉથ આફ્રિકાએ ટીમના અનુભવી સ્ટાર બોલર કાગીસો રબાડાને આરામ આપવાનો નિર્ણય કર્યો છે.
ભારતીય ટીમ સામે ટેસ્ટ શ્રેણી જીત્યા બાદ દક્ષિણ આફ્રિકાની ટીમ હવે ત્રણ મેચની વનડે શ્રેણીમાં રમશે. સિરીઝ શરૂ થવાના એક દિવસ પહેલા મંગળવારે (18 જાન્યુઆરી) દક્ષિણ આફ્રિકાની ટીમે રબાડાને આખી સિરીઝમાંથી આરામ આપવાનો નિર્ણય કર્યો હતો. તેને ત્રણેય મેચમાં બહાર રાખવાનો નિર્ણય અચાનક લેવામાં આવ્યો હતો. બોર્ડે કામનું ભારણ ઘટાડવા માટે આ નિર્ણય લીધો છે.
બોર્ડ દ્વારા જારી કરવામાં આવેલા નિવેદનમાં કહેવામાં આવ્યું છે કે, “ભારત સામે રમાનારી ODI શ્રેણીમાંથી ટીમના અનુભવી ઝડપી બોલર કાગીસો રબાડાને આરામ આપવાનો નિર્ણય લેવામાં આવ્યો છે.” ભારત સામેની સિરીઝમાં આરામ આપવા પાછળનું કારણ તેના કામનો બોજ ઓછો કરવાનું છે. હાલમાં ટીમમાં તેના સ્થાને કોઈ ખેલાડીને લેવા માટે વિચારણા કરવામાં આવી નથી.
ભારતીય ટીમ 19 જાન્યુઆરી, આજે પર્લમાં દક્ષિણ આફ્રિકા સામે પ્રથમ મેચ રમશે. બીજી મેચ પણ આ જ મેદાન પર 21 જાન્યુઆરીએ રમાશે. તે જ સમયે, શ્રેણીની છેલ્લી મેચ 23 જાન્યુઆરીએ કેપટાઉનમાં રમવાની છે.