માન્ચેસ્ટરમાં રમાયેલી ભારત-ઈંગ્લેન્ડની ત્રીજી ODIમાં 5 વિકેટથી જીત મેળવીને ટીમ ઈન્ડિયાએ ICC ODI રેન્કિંગમાં પોતાનું સ્થાન મજબૂત કરી લીધું છે.
ODI સિરીઝ જીત્યા બાદ ભારતે ICC રેન્કિંગમાં નંબર 3નું સ્થાન પાછું મેળવી લીધું છે. ઇંગ્લેન્ડ સામે ભારતની સિરીઝ જીતીને રોહિત શર્માની આગેવાની હેઠળની ટીમ ICC પુરૂષોની ODI ટીમ રેન્કિંગમાં પાકિસ્તાનથી આગળ તેનું ત્રીજું સ્થાન મજબૂત કરે છે.
109 રેટિંગ પોઈન્ટ સાથે ભારત હવે પાકિસ્તાન (106) પર ત્રણ પોઈન્ટની લીડ ધરાવે છે. આ સાથે જ ન્યુઝીલેન્ડ 128 રેટિંગ પોઈન્ટ સાથે ટોપ પર છે. જોસ બટલરની આગેવાની હેઠળની ઈંગ્લેન્ડની ટીમ ત્રણ મેચની વનડે શ્રેણી હારી જવા છતાં 121 રેટિંગ પોઈન્ટ સાથે બીજા સ્થાને છે.
વિકેટકીપર-બેટ્સમેન ઋષભ પંતની અંતિમ મેચમાં પ્રથમ વન-ડે ઈન્ટરનેશનલ સદીથી ભારતે ઈંગ્લેન્ડ સામેની શ્રેણી 2-1થી જીતવામાં મદદ કરી. શ્રેણીમાં જીત સાથે ભારતીય ટીમે ત્રીજું સ્થાન મેળવી લીધું છે.
છઠ્ઠા ક્રમના દક્ષિણ આફ્રિકા હાલમાં પાકિસ્તાનથી માત્ર સાત રેટિંગ પોઈન્ટ પાછળ છે અને જો તેઓ ઈંગ્લેન્ડ સામેની આગામી ત્રણ મેચની શ્રેણી જીતે તો ચોથા સ્થાને જઈ શકે છે.
ભારત મહિનાના અંતમાં વેસ્ટ ઈન્ડિઝ સામે ત્રણ મેચની શ્રેણી રમશે. પાકિસ્તાન હાલમાં શ્રીલંકા સામે ટેસ્ટ મેચ રમી રહ્યું છે. ત્યારપછી ટીમ ઓગસ્ટમાં નેધરલેન્ડ સામે વનડે મેચ રમશે.