રોહિતે વનડેમાં ગેલ અને આફ્રિદીનો રેકોર્ડ તોડ્યો, બન્યો પ્રથમ ભારતીય ખેલાડી

અમદાવાદના નરેન્દ્ર મોદી ક્રિકેટ સ્ટેડિયમમાં રમાઈ રહેલી ભારત અને પાકિસ્તાન વચ્ચેની મેચમાં રોહિત શર્માએ વધુ એક રેકોર્ડ બનાવ્યો છે. રોહિત શર્માએ ભારત વિરુદ્ધ પાકિસ્તાન મેચમાં શાહીન શાહ આફ્રિદી સામે ફટકાર્યા બાદ ODI ક્રિકેટમાં 300 સિક્સરનો આંકડો પાર કરી લીધો છે.

હવે આ યાદીમાં રોહિત શર્માથી આગળ માત્ર વેસ્ટ ઈન્ડિઝના વિસ્ફોટક બેટ્સમેન ક્રિસ ગેલ અને પાકિસ્તાનના પૂર્વ કેપ્ટન શાહિદ આફ્રિદી છે. આ સાથે રોહિત શર્મા ODI ક્રિકેટમાં 300 થી વધુ સિક્સર મારનાર પ્રથમ ભારતીય બેટ્સમેન બની ગયો છે.

આ પહેલા રોહિત શર્માએ અફઘાનિસ્તાન સામેની વર્લ્ડ કપ મેચમાં આંતરરાષ્ટ્રીય ક્રિકેટમાં સૌથી વધુ સિક્સર ફટકારવાનો રેકોર્ડ બનાવ્યો હતો. રોહિત શર્માએ અફઘાનિસ્તાન સામેની મેચમાં વેસ્ટ ઈન્ડિઝના પૂર્વ વિસ્ફોટક બેટ્સમેન ક્રિસ ગેલનો 553 સિક્સરનો રેકોર્ડ તોડ્યો હતો. રોહિત શર્માએ અફઘાનિસ્તાન સામે નવીન ઉલ હકની બોલ પર સિક્સર ફટકારીને ક્રિસ ગેલનો રેકોર્ડ તોડ્યો હતો.

તમને જણાવી દઈએ કે રોહિત શર્માએ પાકિસ્તાન વિરૂદ્ધ 62 બોલમાં 86 રન બનાવ્યા હતા. આ દરમિયાન રોહિત શર્માએ પોતાની ઇનિંગમાં 6 ફોર અને 6 સિક્સર ફટકારી છે. બીજી તરફ ટોસ હારીને પ્રથમ બેટિંગ કરવા આવેલી પાકિસ્તાનની ટીમે 42.5 ઓવરમાં તમામ વિકેટ ગુમાવીને માત્ર 191 રન બનાવ્યા હતા. પાકિસ્તાન તરફથી કેપ્ટન બાબર આઝમે સૌથી વધુ 50 રનનું યોગદાન આપ્યું હતું.