ભારતે વેસ્ટ ઈન્ડિઝ પ્રવાસની શરૂઆત જીત સાથે કરી હતી. ટીમ ઈન્ડિયાએ પોર્ટ ઓફ સ્પેનમાં રમાયેલી પ્રથમ વનડે મેચમાં યજમાન ટીમને 3 રને હરાવ્યું હતું. પ્રથમ બેટિંગ કરતા ભારતે 308 રન બનાવ્યા હતા.
આ દરમિયાન કેપ્ટન શિખર ધવન, શુભમન ગિલ અને શ્રેયસ અય્યરે અડધી સદી ફટકારી હતી. લક્ષ્યનો પીછો કરવા ઉતરેલી વિન્ડીઝની ટીમ 305 રન જ બનાવી શકી હતી. આ જીત સાથે ભારતે ત્રણ મેચની શ્રેણીમાં 1-0ની સરસાઈ મેળવી લીધી છે.
આ મેચમાં ભારતીય ઓપનર શુભમન ગિલે પોતાની ODI કરિયરની પ્રથમ અડધી સદી ફટકારી હતી અને આ સાથે તેણે માસ્ટર બ્લાસ્ટર સચિન તેંડુલકરનો મોટો રેકોર્ડ તોડી નાખ્યો હતો. વેસ્ટ ઈન્ડિઝમાં ODI ક્રિકેટમાં અડધી સદી ફટકારનાર સૌથી યુવા ભારતીયનો આ રેકોર્ડ છે. ગિલે 22 વર્ષ 317 દિવસની ઉંમરમાં આ કારનામું કરીને સચિનને પાછળ છોડી દીધો છે. આ પહેલા સચિન વેસ્ટ ઈન્ડિઝમાં અડધી સદી ફટકારનાર સૌથી યુવા ભારતીય ઓપનર હતો. તેણે 24 વર્ષ અને 3 દિવસની ઉંમરમાં આ કારનામું કર્યું હતું.
બીજી તરફ ઓલ ઓવર રેકોર્ડની વાત કરીએ તો વિરાટ કોહલી પછી ગિલનો નંબર આવે છે. કિંગ કોહલીએ 2010માં વેસ્ટ ઈન્ડિઝમાં 22 વર્ષ 215 દિવસની ઉંમરે અડધી સદી ફટકારી હતી અને તે આવું કરનાર સૌથી યુવા ભારતીય છે.
વેસ્ટ ઈન્ડિઝ સામે મેચ રમતા પહેલા શુભમન ગિલની વનડે કારકિર્દી માત્ર ત્રણ મેચની હતી. 31 જાન્યુઆરી 2019ના રોજ 50 ઓવરમાં ડેબ્યૂ કરનાર ગિલ છેલ્લે 2 ડિસેમ્બર 2020ના રોજ ઓસ્ટ્રેલિયા સામે રમ્યો હતો. હવે સિનિયર ખેલાડીઓની ગેરહાજરીમાં દોઢ વર્ષ બાદ ફરી એકવાર આ ખેલાડીને તક મળી છે. પ્રથમ વનડેમાં શાનદાર 64 રન બનાવનાર ગિલ જો આગામી બે વનડેમાં સારું પ્રદર્શન કરશે તો તે પોતાનો દાવો મજબૂત કરી શકે છે.