ઓસ્ટ્રેલિયા સામેની વનડે શ્રેણીમાં ભારતના બે દિગ્ગજ ખેલાડી રોહિત શર્મા અને વિરાટ કોહલીનું બેટ કામ નહોતું કર્યું. રોહિત શર્મા અંગત કારણોસર મુંબઈમાં પ્રથમ મેચમાં રમ્યો ન હતો, જ્યારે બીજી વનડેમાં તે 13 રન બનાવીને આઉટ થયો હતો.
બીજી તરફ વિરાટ કોહલી બંને મેચમાં LBW આઉટ થયો હતો. તેણે પ્રથમ વનડેમાં 4 રન અને બીજી વનડેમાં 31 રન બનાવ્યા હતા. સૂર્યકુમાર યાદવ અને શુભમન ગિલ પણ અપેક્ષા મુજબનું પ્રદર્શન કરી શક્યા નથી. રોહિત અને કોહલીએ વનડેમાં ઘણા અંગત રેકોર્ડ તોડ્યા છે. પરંતુ ઓસ્ટ્રેલિયા સામેની ત્રીજી વનડેમાં તેની પાસે પાર્ટનર તરીકે મોટી સિદ્ધિ હાંસલ કરવાની તક હશે.
બુધવારે ઓસ્ટ્રેલિયા સામેની ત્રીજી અને નિર્ણાયક મેચમાં રોહિત અને કોહલી પાસે બેટિંગ જોડી તરીકે વર્લ્ડ રેકોર્ડ બનાવવાની શાનદાર તક હશે. રોહિત શર્મા અને વિરાટ કોહલીને વનડેમાં સૌથી ઝડપી 5000 રન બનાવનાર જોડી બનવા માટે માત્ર બે રનની જરૂર છે. જોડી તરીકે, તેઓએ 85 ઇનિંગ્સમાં 62.47ની સરેરાશથી 4998 રન બનાવ્યા છે. તેઓ ODI ક્રિકેટના ઈતિહાસમાં 60થી વધુની સરેરાશથી 4000થી વધુ રન બનાવનાર પ્રથમ જોડી છે. બંનેએ સાથે મળીને 18 સદીની ભાગીદારી પણ કરી હતી.
જો તે બુધવારે ત્રીજી ODI દરમિયાન બે રન બનાવવામાં સફળ થશે, તો તે વેસ્ટ ઈન્ડિઝના દિગ્ગજ ગોર્ડન ગ્રીનિજ અને ડેસમંડ હેન્સને પાછળ છોડી દેશે, જેઓ હાલમાં 97 ઈનિંગ્સમાં સૌથી ઝડપી 5000 ODI રનનો રેકોર્ડ ધરાવે છે. આ યાદીમાં મેથ્યુ હેડન અને એડમ ગિલક્રિસ્ટની જોડીએ 104 ઇનિંગ્સમાં આ કારનામું કર્યું છે અને શ્રીલંકાના તિલકરત્ને દિલશાન અને કુમાર સંગાકારાએ 105 ઇનિંગ્સમાં આ કારનામું કર્યું છે.
રસપ્રદ વાત એ છે કે, રોહિત હાલમાં સૌથી ઝડપી 5000 ODI રન બનાવનારી ભારતીય જોડી પણ છે. તેણે શિખર ધવન સાથે મળીને 112 ઇનિંગ્સમાં આ કારનામું કર્યું હતું. રોહિત અને કોહલી ઓપનિંગ વિના 5000 રન પૂરા કરનાર પ્રથમ જોડી બની જશે.