૧૧ જાન્યુઆરીથી ન્યૂઝીલેન્ડ સામે શરૂ થનારી ત્રણ મેચની વનડે શ્રેણી પહેલા ટીમ ઈન્ડિયામાં ફેરફાર થવાની શક્યતા છે. અહેવાલો અનુસાર, શ્રેયસ ઐયરની ફિટનેસ તપાસ હેઠળ છે, અને જો તેને મેડિકલ ક્લિયરન્સ નહીં મળે, તો રુતુરાજ ગાયકવાડને ટીમમાં સામેલ કરી શકાય છે.
૩ જાન્યુઆરી ભારતીય ક્રિકેટ કંટ્રોલ બોર્ડ (BCCI) એ ન્યૂઝીલેન્ડ સામેની ત્રણ મેચની વનડે શ્રેણી માટે ૧૫ સભ્યોની ભારતીય ટીમની જાહેરાત કરી, જેમાં ભારતીય વનડે ઉપ-કપ્તાન શ્રેયસ ઐયર પણ પાછો ફર્યો. જોકે, બોર્ડે સ્પષ્ટતા કરી કે ઐયરની ઉપલબ્ધતા તેની ફિટનેસ ક્લિયરન્સ પર નિર્ભર રહેશે.
ઉલ્લેખનીય છે કે શ્રેયસ ઐયર ગયા વર્ષે ઓક્ટોબરમાં ઓસ્ટ્રેલિયા સામે સિડની વનડે દરમિયાન ફિલ્ડિંગ કરતી વખતે ઘાયલ થયા બાદથી કોઈ ક્રિકેટ રમ્યો નથી. ઐયર ૬ જાન્યુઆરીએ જયપુરમાં હિમાચલ પ્રદેશ સામે વિજય હજારે ટ્રોફી ૨૦૨૫-૨૬ મેચ રમીને પોતાની ફિટનેસ સાબિત કરશે. જો તેને લીલી ઝંડી મળશે, તો તે સીધો વડોદરા જશે અને ભારતીય ટીમમાં જોડાશે.
જો ફિટનેસની ચિંતા ચાલુ રહે, તો ઐયર 8 જાન્યુઆરીએ પંજાબ સામે વિજય હજારે સામે બીજી મેચ રમી શકે છે. ક્રિકબઝના તાજેતરના અહેવાલ મુજબ, જો ઐયર BCCIના સેન્ટર ઓફ એક્સેલન્સ (COE) પાસેથી તબીબી મંજૂરી મેળવવામાં નિષ્ફળ જાય, તો પસંદગીકારો ઋતુરાજ ગાયકવાડનો ટીમમાં સમાવેશ કરી શકે છે, જોકે આ અસંભવિત માનવામાં આવે છે.
ઋતુરાજ ગાયકવાડે તાજેતરમાં દક્ષિણ આફ્રિકા સામેની ODI શ્રેણીની બીજી મેચમાં શ્રેયસ ઐયરની ગેરહાજરીમાં ચોથા નંબરે બેટિંગ કરીને સદી ફટકારી હતી. તેમ છતાં, તેને ન્યૂઝીલેન્ડ સામે જાહેર કરાયેલી ટીમમાં સામેલ ન કર્યો.