ICC ODI વર્લ્ડ કપ 2023 5 ઓક્ટોબરથી શરૂ થવા જઈ રહ્યો છે. ઘણા દિગ્ગજ ક્રિકેટરો પહેલાથી જ આગામી વર્લ્ડ કપમાં પોતાની ફેવરિટ ટોપ-4 ટીમો વિશે પોતાનો અભિપ્રાય વ્યક્ત કરી ચૂક્યા છે. હવે આ શ્રેણીમાં પૂર્વ ભારતીય ઓલરાઉન્ડર યુવરાજ સિંહનું નામ પણ સામેલ થઈ ગયું છે.
યુવરાજે વર્લ્ડ કપ 2023 સેમીફાઇનલમાં રમી શકે તેવી ટીમોના નામ આપ્યા છે. જોકે, યુવરાજે ચારને બદલે પાંચ ટીમનો ઉલ્લેખ કર્યો હતો. તેનું માનવું છે કે આ વખતે ટૂર્નામેન્ટમાં દક્ષિણ આફ્રિકા ચોંકાવી શકે છે. તમને જણાવી દઈએ કે દક્ષિણ આફ્રિકા ક્યારેય ટાઈટલ જીત્યું નથી.
યુવરાજનું માનવું છે કે ભારત, ઓસ્ટ્રેલિયા, ન્યુઝીલેન્ડ અને ઈંગ્લેન્ડની ટીમો સેમીફાઈનલમાં પ્રવેશવાની મોટી દાવેદાર છે પરંતુ દક્ષિણ આફ્રિકાને અવગણી શકાય નહીં. દક્ષિણ આફ્રિકાએ તાજેતરમાં ઓસ્ટ્રેલિયાને ઘરઆંગણે વનડે શ્રેણીમાં 3-2થી હરાવ્યું હતું. દક્ષિણ આફ્રિકાએ શ્રેણીની પ્રથમ બે મેચ હાર્યા બાદ આ સિદ્ધિ મેળવી હતી.
યુવરાજ સિંહે ધ વીકને કહ્યું, “ભારત, ઓસ્ટ્રેલિયા સેમિફાઇનલમાં હશે. હું પાંચ ટીમ પસંદ કરીશ કારણ કે વર્લ્ડ કપમાં હંમેશા અપસેટ થાય છે. ભારત, ઓસ્ટ્રેલિયા, ન્યુઝીલેન્ડ, ઈંગ્લેન્ડ અને મને લાગે છે કે દક્ષિણ આફ્રિકા આશ્ચર્યચકિત કરી શકે છે.”
41 વર્ષીય યુવરાજને જ્યારે વર્તમાન યુગના સર્વશ્રેષ્ઠ ઓલરાઉન્ડર વિશે પૂછવામાં આવ્યું તો તેણે ઓસ્ટ્રેલિયાના મિચેલ માર્શ, ભારતના રવિન્દ્ર અને ઈંગ્લેન્ડના સ્ટાર ઓલરાઉન્ડર બેન સ્ટોક્સનું નામ લીધું.