ભારતીય બેટ્સમેન મનીષ પાંડે ભલે લાંબા સમયથી ભારતીય ટીમની બહાર હોય, પરંતુ તે સ્થાનિક ક્રિકેટમાં ઘણો સક્રિય છે. જો કે, સ્થાનિક ક્રિકેટમાં પણ, તે રાષ્ટ્રીય ટીમમાં તેના વાપસીનો માર્ગ મોકળો કરવા માટે પૂરતા રન બનાવી શક્યો ન હતો, પરંતુ બુધવારે, 28 ડિસેમ્બરે તેણે જોરદાર રમત બતાવી.
વાસ્તવમાં, મનીષ પાંડેએ તેની 100મી ટેસ્ટ મેચમાં બેવડી સદી ફટકારી છે. તેણે ગોવાની ટીમ સામે 186 બોલમાં 14 ચોગ્ગા અને 11 છગ્ગાની મદદથી 208 રનની અણનમ ઇનિંગ રમી હતી. આ દરમિયાન તેનો સ્ટ્રાઈક રેટ 111.83 હતો. મનીષ પાંડેની સદી લાંબા સમય બાદ બહાર આવી છે. છેલ્લી 12 ઇનિંગ્સમાં પણ તે માત્ર એક જ વખત અડધી સદી ફટકારી શક્યો હતો. આવી સ્થિતિમાં આ ઈનિંગ મહત્વની સાબિત થઈ.
જે રીતે ડેવિડ વોર્નરે પોતાની 100મી ટેસ્ટ મેચમાં 8000 રનનો આંકડો પાર કર્યો હતો. તેવી જ રીતે મનીષ પાંડેએ તેની 100મી ફર્સ્ટ ક્લાસ મેચમાં 7000 રનનો આંકડો પાર કર્યો હતો. તે 2008 થી કર્ણાટક માટે ફર્સ્ટ ક્લાસ ક્રિકેટ રમી રહ્યો છે, પરંતુ તેને દેશ માટે એક પણ ટેસ્ટ મેચ રમવાની તક મળી નથી. જો કે, તે ભારત માટે ODI અને T20 ક્રિકેટમાં ઘણી મેચ રમ્યો છે.