રણજી ટ્રોફી 2022ની બીજી ક્વાર્ટર ફાઈનલ મેચમાં, મુંબઈનો ઉત્તરાખંડનો સામનો થયો. આ મેચમાં મુંબઈએ 725 રનથી જીત મેળવીને નવો વર્લ્ડ રેકોર્ડ બનાવ્યો હતો.
ફર્સ્ટ ક્લાસ ક્રિકેટમાં અત્યાર સુધી કોઈ ટીમ રનના આટલા મોટા માર્જિનથી જીતી નથી. પૃથ્વી શોની કપ્તાનીમાં મુંબઈએ શાનદાર પ્રદર્શન કરીને સેમીફાઈનલમાં જગ્યા બનાવી હતી.
આ મેચમાં મુંબઈની ટીમે ઉત્તરાખંડ પર સંપૂર્ણ રીતે પ્રભુત્વ જમાવ્યું હતું અને પ્રથમ દાવમાં આ ટીમે સુવેદ પારકરના 252 રન એટલે કે બેવડી સદી અને સરફરાઝ ખાનના 153 રનના આધારે 8 વિકેટે 647 રન બનાવ્યા હતા. શમ્સ મુલાનીએ પણ પ્રથમ દાવમાં શાનદાર યોગદાન આપ્યું હતું અને 59 રન બનાવ્યા હતા. બીજી તરફ ઉત્તરાખંડની ટીમ પ્રથમ દાવમાં 114 રનમાં ઓલઆઉટ થઈ ગઈ હતી. મુંબઈ તરફથી શમ્સ મુલાનીએ પ્રથમ દાવમાં 5 વિકેટ લીધી હતી. આ રીતે મુંબઈને પ્રથમ દાવમાં 533 રનની લીડ મળી હતી.
આ પછી મુંબઈએ ફરી એકવાર યશસ્વી જયસ્વાલની 130 રનની સદી, કેપ્ટન પૃથ્વી શોના 72 રન અને આદિત્ય તારેના 57 રનની મદદથી બીજી ઈનિંગમાં 3 વિકેટે 261 રન બનાવ્યા હતા. આ પછી મુંબઈને 794 રનની કુલ લીડ મળી અને ઉત્તરાખંડને જીતવા માટે 795 રનનો ટાર્ગેટ મળ્યો. આ પછી બીજા દાવમાં ઉત્તરાખંડની ટીમ મુંબઈની બોલિંગ સામે પડી ભાંગી હતી અને આખી ટીમ 69 રનમાં ઓલઆઉટ થઈ ગઈ હતી. આ રીતે મુંબઈને 725 રનના માર્જિનથી રેકોર્ડ જીત મળી હતી.